Salvatore Mereu torrat a su fèstival de su tzìnema de Venètzia. Assandira, s’ùrtima pellìcula de su regista de Durgali cun nd’una istòria leada dae su libru omònimu de s’antropologo Giulio Angioni, est istada seberada pro leare parte foras de su cuncursu ufitziale.
Una detzisione chi, comente at fatu cumprèndere su diretore de sa mustra Alberto Barbera presentende sa de 77 editziones, non donat giustìtzia a su film chi si no èsseret pro ite is pellìculas italianas in cuncursu fiant giai bator, sa pellìcula depiat èssere in sa seletzione ufitziale. “Non bos depides pèrdere custu film”, at naradu.
Sa pellìcula si presentat cun sa partetzipatzione de Gavino Ledda comente atore. S’autore de su libru famadu meda, ‘Padre padrone’, est istadu giai protagonista in un’àteru film: cussu de is frades Taviani bogadu in su 1977 dae su matessi libru e premiadu in su fèstival de Cannes cun sa Parma de Oro. In sa pellìcula de Mereu, Gavino Ledda est unu pastore betzu afligidu pro sa morte de su fìgiu Mario in una note de fogu, chi si nche aiat papadu finas s’agriturismu fraigadu cun medas sacrifìtzios. Mario fiat torradu a Sardigna dae sa Gèrmania, in ue fiat disterradu paris cun s’isposa sua…
Pro Mereu custa est sa de chimbe bortas a su fèstival de Venètzia. Finas a oe nche fiat giai istadu cun Ballo a tre passi, Tajabone, Bellas Mariposas e Futuro Prossimo.
