Bidda sarda contra a s’ispopolamentu: iscatu de grupu pro totus is abitantes de Bànari In su tzentru minore de sa provintzia de Tàtari 600 pessones ant a si nde fàghere fotografare in paris.

At a èssere sa prus manna foto de grupu de su mundu mai dedicada a una comunidade locale. Nemos at mai reunidu totus is abitantes de una bidda pro un’iscatu de grupu. Su 4 austu Bànari, gràtzias a su fotògrafu Marco Ceraglia, at a intrare in su libru de sos rècords. Sa bidda de sa provìntzia de Tàtari, comunidade minore a tira agrìcula, at a èssere ammentada pro unu primadu originale: sos suos 600 abitantes s’ant a agatare e ant a fàghere a modellu pro un’iscatu de portada istòrica.

Su tam tam est giai partidu, sas fainas de animatzione de Marco Ceraglia e OrdinariMai, s’assòtziu culturale de cale est presidente e ànima, sunt in una fase sobrada. In sas pratzas de su tzentru minore, ma fintzas in sas domos de sos banaresi, est partidu su countdown.

A ddu nàrrere totu, su guinness de sos primados no est sa prioridade de Ceraglia, de su suo entourage, de s’amministratzione comunale e de sos partners pùblicos e privados chi ant aderidu a su progetu. “Sa foto de grupu prus manna de su mundu” est in antis de totu un’esperimentu de arte pro mèdiu de cale Bànari, su territòriu, sa Sardigna – ma in manera ideale totus sas minores comunidades locales de Itàlia e de su mundu chi afrontant su matessi problema – reagint in manera creativa a su problema de su spopolamentu.

A ispirare su progetu sunt istados sos flussos migratòrios chi interessant meda Comunos sardos. Oe sas proportziones sunt tales de fàghere finire sa chistione in s’agenda polìtica. Si discutit, si pensant solutziones. Su progetu de Bànari ghetat s’allarme e oferit un’esperimentu artìsticu-sotziale pro ricreare sensu de comunidade, ispìnghere cara a una rivendicatzione corale, unu sensu nou de apartenèntzia, in antìtesi cun sos fatores chi induint o costringhent sa gente a si nd’andare.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.