Unu progetu pro agiudare is tzitadinos chi benent dae s’Àfrica a fraigare impresas noas in Sardigna, mescamente in cussas biddas chi sunt sufrende s’ispopulamentu. Dd’ant cramadu ‘Migrare: Sardegna chiama Africa’ e dd’at imbentadu s’assòtziu SocialMed chi como est cumentzende cun sa de duas fases.
Sa punna de su progetu est de megiorare s’iscàmbiu tra is persones arribadas dae is paisos de s’Àfrica a s’ìsula nostra, in ue istant e tenent sa residèntzia, e sa comunidade sarda promovende sa connoschèntzia de is deretos, de is doveres e de is oportunidades chi dat sa lege italiana. “S’intentu – est iscritu in una nota de imprenta – est su de favorire s’ameddu tra culturas diferentes, pro evitare disacòrdios e pro donare valore a sa diversidade”.
In sa de duas fase de su progetu ant a èssere seberados 6 giòvanos migrantes chi ant a imparare comente pesare un’impresa in cussas zonas de sa Sardigna chi sunt prus sugetas a su fenòmenu de s’ispopulamentu. S’ant a fàghere unos cantos addòbios chi ant a serbire pro regòllere is istòrias de is migrantes chi leat parte a s’initziativa e at a èssere realizada una sèrie de intervistas. “A pustis ant a cumentzare laboratòrios pro donare a ses giòvanos immigrados, òmines e fèminas, agiudu pro si inserire in setores istratègicos pro s’identidade econòmica e sotziale de sa Sardigna comente sa massaria e s’artesania”.
Sa primu fase de su progetu s’est giai lòmpida a concruimentu at interessadu is istudiantes de is iscolas mèdias e superiores de s’ìsula pro mesu de atopos acanta s’est chistionadu de migratzione. Leant parte a su progetu comente collaboradores EjaTv, s’assòtziu Entulas, su Tzentru italo-àrabu e de su Mediterràneu, sa Càmera de cooperatzione italo-àraba.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
