Andrea Mura at naradu chi issu fait polìtica andande a vela e non a su Parlamentu Su deputadu sardu de su M5S at respostu aici pro canto pertocat sas numerosas ausèntzias a sa Camera. Su Movimentu: "A foras".

“Sa faina polìtica non si fait isceti in Parlamentu, si podet faghere fintzas in una barca. Dd’apo naradu finas de su cumintzu, fintzas in campagna eletorale, chi su ruolu meu, prus chi cuddu de arresonare, diat èssere istadu cuddu de testimonial a defensa de sos otzèanos”.

Aici, in nd’una intervista a sa Nuova Sardegna, su velista Andrea Mura, deputadu sardu de su M5S acusadu dae su parlamentare de FI Ugo Cappellacci de èssere istadu ausente de Montecitorio su 96% de sas bias.  Mura narat de andare a su Parlamentu “una borta a sa chida, pro sa cummissione de Trasportos. Cumprendo s’incredulidade, ma deo dd’apo naradu finas de su cumintzu a su Movimentu chi non bolia fàghere su parlamentare ma su testimonial pro sarvare sos otzèanos de sa plàstica”.

Su deputadu contat puru chi in su mese de santandria at a èssere impinnadu in sa ‘Rota de su rum’, una regata in assoladu de sa Frantza a sos Caraibi. “Apo a impreare s’imbarcatzione mea dae in antis duos milliones e mesu de ispetadores e a 90 milliones de telecàmeras pro trasmìtere unu messàgiu fundamentale: sarbare sos otzèanos dae sas microplasticas”. E sìghit narande chi su M5s “ischiat cale diat èssere istadu su ruolu meu e mi apojat in custa batalla. Cun sa majoria chi sos Chimbe Isteddos tenent a sa Camera, chi deo siat presente o prus pagu non faghet carchi diferèntzia”.

Is paràulas de Mura ant fatu arràbiare meda sos capugrupos de su M5S de sa Camera e de su Senadu. In nd’una nota de imprenta Francesco d’Uva e Stefano Patuanelli iscrient: “Si su deputadu Andrea Mura bolet sighire a si dedicare mecamente a àteras fainas, discuidende su mandadu chi dd’ant assignadu a issu sos tzitadinos, tenet una sola istrada de sighire: cussa de presentare sas dimissiones de parlamentare”. De su matessi parre su meri polìticu de su Movimentu, Luigi Di Maio.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.