Sa Tzitade metropolitana de Casteddu est istada seberada pro unu de is allenamentos de badminton de sa Natzionale Italiana. Difatis, dae su 27 de su mese de mese de argiolas finas a su 9 de austu, in Maracalagonis est in programma sa preparatzione pro is campionados internatzionales chi in su 2021 ant a acabbare cun is Giogos Olìmpicos.
“Is asulos”, ghiados dae su diretore tècnicu Arturo Ruiz e dae is allenadores Javier Gallego, Lorenzo Pugliese e Wisnu Putro, s’ant a allenare in su “Pala 3A Arborea – MaraBadminton”, s’impiantu prus mannu de Itàlia dedicadu a su badminton, istrutura ùnica in Sardigna pro una disciplina isportiva chi oe est sa de tres prus praticada in su mundu. Su palatzetu podet acollire prus de 700 persones in is tribunas.
Ma ite est su Badminton? Est un’isport olìmpicu dae su 1992. Praticadu meda in Oriente e in Nord Europa, est semper prus difùndidu fintzas in sa versione a s’abertu “Air badminton”.
Is deghennoe atletas presentes a Maracalagonis sunt Enrico Baroni, Gianmarco Bailetti, Fabio Caponio, Martina Corsini, Katharina Fink, Carl Fredholm, Alessandro Gozzini, Giovanni Greco, Yasmine Hamza, Judith Mair, Matteo Massetti, Chiara Passeri, Emma Piccinin, David Salutt, Gianna Stiglich, Kevin Strobl, Giovanni Toti, Alessandro Vertua e Luca Zhou.
Is atletas, a pustis de su retiru sardu, ant a bolare in Südtirol, a Malles in Val Venosta, in ue ant a concruire sa preparatzione issoro in bista de sa ripresa de is fainas agonìsticas.
S’acàpiu de su badminton cun sa Sardigna est ònnia annu prus forte fintzas gràtzias a su remenu de su diretore de s’Ufìtziu Iscolàsticu Regionale, Francesco Feliziani, dae semper atentu a sa promotzione de s’isport in s’iscola. Est istadu Feliziani, in collaboratzione cun sa comuna de Maracalagonis e cun sa bonànima de su sìndigu Mario Fadda, a s’impinnare in su recùperu de su palatzetu de s’isport. Fintzas a pustis de s’iscumparta de su sìndigu Fadda, sa comuna de Maracalagonis at sighidu a collaborare a custu progetu de importu mannu, ùnicu in Itàlia.
In is dies de permanèntzia de sa Natzionale de badminton in Sardigna ant a èssere organizadas fintzas fainas promotzionales comente sa realizatzione de vìdeos de Casteddu pro favorèssere su connoschimentu de su badminton e pro promòvere sa Sardigna comente logu ideale pro sa pràtica de un’atividade isportiva sana.
L. M
