Su tìtulu sardu de s’editzione nùmeru bintisete de su Campionau Sardu de sa Murra est tocadu a is biddamannesos Nicola Monni e Fabio Floreddu. Medas is murradores lòmpidos dae Thiniscole, Alà, Padru, Irgoli, Buddusò, Ortueri, Durgali, Orgòsolo, Baunei, Biddamanna, Irbono, Barì, Jersu, Osini, Foghesu e Biddeputzi.
Fiant 34 is còpias de giogadores chi sàbadu coladu sunt arribbadas dae diversos tzentros de sa Sardigna a Orthullè pro partetzipare a sa de bintisete editziones de su Campionau Sardu de sa Murra. Una serada longa de giogu, mùsica e traditzione, concruida cun sa vitòria de sa còpia de Biddamanna.
Su coro de sa manifestatzione, organizada dae su Sòciu po su de Jocu de sa Murra, cun s’agiudu su comitadu Fedales 76-86-96, fiat in Pratza Funtana Bècia e in s’anfiteatru.
Is garas ant cumentzadu a pustis de sa chena cumbidada dae su Comitadu. Su pùblicu at sighidu is partidas finas a tardu mannu de note, acumpangende cun atentzione is giogadas de is murradores, acumpangiadas de cant’ora dae is sonadas de is sonadores de organitu Eugenio Cabras e Simone Cabiddu.
Bellas meda is giogadas, in una cumpetitzione in ue esperièntzia, lestresa e cuntzentratzione faghent sa diferèntzia. Non sunt mancadas unas cantas discussiones durante is partidas, ma custu puru faghet parte de su giogu e totu est agabbadu cun un’istrinta de manu.
A sa finale sunt arribadas duas còpias de biddas e esperièntzias diversas. A una banda is rapresentantes de Biddamanna Strisàili Nicola Monni e Fabio Floreddu, a s’àtera sa còpia de domo formada dae Enrico Arba, una cara giai connota e binchidore de diversos tìtulos, e dae su fradile Giorgio Arba, de 17 annos ebbia.
Is bator finalistas ant giogadu cun ànimu, passione e cuntzentratzione, e a s’agabbu su primu postu e su tìtulu de Campiones Sardos de sa Murra 2026 est andadu a is biddamannesos.
Nicola Monni, chi aiat giai bìnchidu s’editzione de ocannu coladu in còpia cun Elia Coccoda, duncas at torradu a bìnchere custa bia puru cun su cumpàngiu de giogu nou Fabio Floreddu. S’iscaleri prus bàsciu de su pòdiu est istadu imbetzes a is jersesos Daniele Dessì e Fabiano Urru, chi ant cassadu a Emilio Fancello e Nicola Pisu de Orthullè in sa bella pro su tertzu postu.
Intre is partetzipantes de ocannu fintzas una pisedda de 14 annos, Ramona Lai de Thiniscole, chi at giogadu sena timòria contra murradores prus mannos e de esperièntzia e atirende s’atentzione de su pùblicu cun is giogadas suas. Sa presèntzia sua est unu singiale importante pro una traditzione chi, pro sighire a bìvere, tenet bisòngiu fintzas de sa balia de is levas noas.
Su Campionau no est istadu petzi giogu, difatis, mùsica e ispetàculu ant acumpangiadu sa manifestatzione a totu note.
Apretziadas meda is cantadas de is tenores de Orthullè Memòria e Identidade e Su Narcone, paris cun sos ballos sardos. Un’àteru piessignu prus de contu de su Campionau Sardu de sa Murra est s’impreu de sa limba sarda in totu is fases printzipales de sa manifestatziones. Fintzas ocannu sa presentada de is iscuadras e de is giogadores, sa crònaca de is garas, sa comunicatzione de s’eventu, is materiales promotzionales e is premiatziones, fiant sardu.
