Non bi sunt sos referendum ebbia. S’8 e su 9 de làmpadas sunt ses sos Comunes in ue si vota pro su rinnovu de sos òrganos de guvernu: Nùgoro, Onieri, Muristeni, Cardedu, Goni e Solèminis. Sas eletziones chi tenent s’importu prus mannu sunt sas de su cabu de logu barbaritzinu.
Inoghe, su mese de maju de s’annu coladu, est finida s’esperièntzia de sa Giunta ghiada dae Andrea Soddu (chi pagos meses in antis fiat candidadu a sas regionales cun Renato Soru). Tando, cun 13 votos contràrios e petzi 11 favorèvoles, su Cussìgiu no aproveit su bilàntziu de previsione.
Est disafiu, como, intre su campu largu de tzentru manca a un’ala e su tzentru dereta cun su de tres polos a s’àtera. Is primos sunt candidende a Emiliano Fenu, senadore de su Movimentu 5 Isteddos e chi in antis de nche lòmpere a su Parlamentu fiat Revisore de sos contos in sos Comunes (che a su de Thiniscole). Un’espertu de bilàntzios, duncas, pro torrare a sa chistione chi nd’at fatu rùere a Soddu.
Is àteros ant seberadu a Giuseppe Luigi Cucca, giai segretàriu regionale de su Pd dae su 2017, coladu a Italia Viva su 2019 e a is de Calenda su 2023. De Cucca si podet nàrrere chi Christian Solinas lu cheriat segretàriu generale de sa RaS e chi sa sorre Gemma fiat in su collègiu chi decrareit decàida Alessandra Todde.
In Nùgoro, duncas, si votat s’8 e su 9 de làmpadas. Ma est possìbile unu segundu turnu de ballotàggiu s’in casu sa coalitzione chi binchet a su primu non nche lompet a sa majoria assoluta. Su 2020 custos fiant sos resurtados: Andrea Soddu (listas tzìvicas) cun su 28,8%; Pietro Sanna (tzentru dereta) cun su 24,4%; Carlo Prevosto (tzentru manca) cun s’11,6%; Lisetta Bidoni (manca) cun su 10,6%; Ciriaco Offeddu (listas tzìvicas) cun su 9,6%; Francesco Guccini (listas tzìvicas) cun s’8,8%; Alessandro Murgia (M5s) cun su 6,1%. Soddu bincheit su ballotàgiu.
–
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
