Pro more de sa ruta de una parte de su cobertura de su càrtzere romanu de Regina Coeli, prus de 300 cartzerados ant dèpidu essere trasferidos in àteros penitentziàrios italianos, unos chentu de custos ddos ant mandados in is istitutos sardos. S’isfollamentu repente at postu a sa proa su sistema penitentziàriu de s’ìsula, acanta sa Politzia Penitentziària, is diretores e totu su personale de is istitutos sardos ant traballadu sena pasu pro garantire seguresa e bonu tratòngiu a is detenutos, mancari su pagu tempusde preavisu.
A denuntziare custa situatzione est Irene Testa, garante de is detenutos: “Medas trasferimentos sunt acontèssidos in su coro de sa note. A una chentina cartzerados nde ddos ant leados a is 2, àteros a is 5 de mangianu, comente is de su càrtzere de Bancali. A custos ddos ant avèrtidos de su biàgiu petzi 20 minutos a in antis de sa partèntzia e, a su chi est essende a campu, diat àere retzidu sacos dae plàstica pro ddoe betare is ogetos persolales, pagu primu de ddos imbarcare in un’aèreu de sa Guàrdia de Finàntzia. Segundu calicuna testimonia, unos cantos ddos ant trasferidos a babucias e a e acapatòiu, sena tènnere s’ora de boddire bestires o benes personales.
In su coro de sa note, su personale penitentziàriu sardu s’est donadu ite fàghere pro cuncordare is tzellas, nointames, comente sutalìniant is sindacados, mancari is diretores de is istitutos no aerent retzidu informatziones de sa casta de is detenutos in arribu, essende chi medas presentaniant problemas de tossicodipendèntzia e psichiàtricos.
Su càrtzere de S’Alighera est su chi at tentu prus istorbu dae custa mòvida. “S’arribu improvisu de is cartzerados noos at treuladu totu is turnos de su personale in servìtziu, pro no allegare de sa gestione partzidura de is tzellas tra is cartzerados noos e is chi sunt giai presentes in s’istrutura”, denùntziat Giovanni Villa, segretàriu generale de sa Fns Cisl Sardigna.
“De prus, medas detenutos noos non sunt adatos a is programmas de su càrtzere de S’Alighera, chi traballat dae annos subra de progetos de reinserimentu e rieducatzione. Custu arriscat de cumpromìtere is resurtados importantes otentos finas a oe”, at agiuntu su sindacalista.
Segundu Irene testa, medas istitutos de s’ìsula, giai in dificultade pro sa mancàntzia de personale e de servìtzios sanitàrios internos, in prus tenent una populatzione cartzerària prus arta meda de su chi diat pòdere bajulare. “E no est finida- at agiuntu sa garante- in prus de is 100 detenudos arribbados dae Regina Coeli e sos 92 in règimene de 41 bis in arribbu, diant dèpere lòmpere àteros 30 cartzerados destinados a sas colònias penales sardas. Ap’a pedire contu de is modalidades de trasferimentu e si siant istadas respetadas is protzeduras. S’apretu non podet giustificare eventuales violatziones de su deretu e su dipartimentu de amministratzione penitentziària non podet fàghere a manera chi sa Sardigna torret comente una Caienna”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
