Un’artìculu publicadu giòbia su 9 de mese de ladàmine in sa rivista Scenari Economici at abertu sa dibata in contu de indùstria bèllica in Sardigna: segundu su documentu, bogadu a campu dae s’assòtziu Sardegna chiama Sardegna, sa Rheinmetall (RWM) — s’azienda tedesca produtora de armamentos cun istabilimentos in Musei e Domusnoas — paris cun sa sotziedade israeliana Uvision, diat àere annuntziadu s’inghitzu de sa produtzione in sèrie de «drones kamikaze» in s’ìsula. Su Sulcis, si leghet in s’inchiesta giornalìstica, diat pòdere divènnere «unu polu avantzadu pro una de is tecnologias militares prus rechestas in custu mamentu», cun sa produtzione fintzas de drones lèbios.
Bronta sa reatzione de Sardegna chiama Sardegna: is portaboghes Cristiana Cacciapaglia e Danilo Lampis pensant chi sa noa tèngiat unu fundamentu e ant pediu a sa Regione e a is sindacados de intervènnere deretu. «Non faghet a s’abarrare a sa muda o, peus, a èssere cumpiagherosos», ant naradu is duos ativistas, chi definint su Sulcis «unu logu chi non podet sighire a èssere sacrificadu pro fraigare armas chi càusant morte e destruidura».
Segundu Sardegna chiama Sardegna, diat bisongiare una reconversione de sa RWM «sarbende is postos de traballu e promovende formas noas de isvilupu pro su territòriu». S’assòtziu, in prus, at naradu chi ddoe tenet s’arriscu cuncretu chi is armas prodùidas siant impreadas «in totu is gherras su mundu e puru contra is populatziones disarmadas»: is godàngios diant andare «a Germània e a Israele» e su Sulcis diat pòder divènnere un’àrea istratègica «sensìbile meda», bida sa partetzipatzione de sa NATO a sa gherra in Ucràina.
Su movimentu polìticu denùntziat posca chi si sighit in cust’àndala, sa regione nostra s’at a acapiare a manera istrinta cun un’azienda de su cumplessu militare israelianu, devenende deretu còmplitze de cada atzione sua, cando a s’imbesse diamus àere dèvidu segare giai dae meda ogna raportu diplomàticu e cummertziale cun Israele, màssimu a pustis de s’inghitzu de s’ocupatzione de Gaza e s’isperdimentu de su pòpulu palestinesu.
Contra s’ipòtesi de furriare sa Sardigna a polu de s’indùstria militale, e contra sa produtzione de bombas in s’istabilimentu RWM de Domusnoas, pro su 17 de mese de ladàmine, in Casteddu, est prevìdida una manifestatzione de protesta.
