In intro de un’operatzione de chirca e de bonìfica de un’ordignu bèllicu in sos fundales marinos de Pula, su nùcleu Sdai Casteddu de Comsubin coordinadu dae su Capitanu de corveta Gabriele Paparo at individuadu una conca de terràllia imboligada in una retza pro piscare.
Deretu sos palombaros – sende chi sa zona tenet un’importu mannu istòricu e archeològicu – ant pensadu de recuperare su repertu avisende a sos de sa Subrintendèntzia de Casteddu.
Semus faeddende de una conca agigu prus minore de sas dimensiones naturales suas e chi mustrat sa cara de unu personàgiu maschile. No est sa prima conca chi agatant in cussos tretos.
A su chi narat sa funtzionària archeòloga Chiara Pilo «sa conca s’annanghet a àteros repertos de terràllia agatados in su promontòriu de Coltellazzo in sas chircas de concruos de sos annos 70 e de comintzu de sos annos 80, cando agateint àteras chimbe concas». Possìbile chi custos manufatos siant de època romana republicana.
Deretu is de sa Subrintendèntzia ant aviadu tratamentos desalinizantes netzessàrios a garantire sa cunservatzione de sos repertos atzapados in cuntestu subàcueu. Dae Casteddu nos contant finamentas de sa consulèntzia de sa Soprintendenza Natzionale pro su patrimòniu culturale subàcueu, chi in Terranoa tenet unu tzentru operativu.
Ma b’at àteru: su personale de s’istrutura, semper in custas dies, est collaborende cun sos carabineris de su Nùcleu Tutela Patrimòniu Culturale de Casteddu e de su Nùcleu Subàcueos. Programmadas in cussos tretos noas e àteras ispetziones pro averguare sa presèntzia de àteros repertos archeològicos e giatzimentos subàcueos in sa zona a inghìriu de Nora.
Su chi ant agatadu in custas dies l’ant a espònnere in su Museu Patroni, chi ant a abèrrere a nou luego gràtzoas a s’interessu de s’amministratzione comunale de Pula.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
