Cando faeddamus de seguridade tzibernètica no est semper chi faghimus cumbinare custu arresonu cun su de sa democratzia locale. E puru ischimus chi oe sos Entes locales sunt die cun die gestende unu patrimòniu mannu de datos sensìbiles, de informatziones anagràficas ligadas a sos tributos e a sos servìtzios sotziales.
Dae custa digitalizatzione de s’amministratzione pùblica locale est nàschida sa netzessidade de nch’acurtziare su tzitadinu pagu avesu a sas tecnologias modernas o a sos sistemas de atzessu. Ma s’est manifestada fintzas sa netzessidade de una prus profunda seguresa a dae chi sos Entes locales podent èssere bersàllios primàrios de atacos informàticos. Mescamente in sas biddas minores, ue non b’at budget bastante o personale ispetzializadu.
Su perìgulu cuncretu est duncas su de blocare servìtzios essentziales, ma fintzas su de violare sa privadesa de sos tzitadinos. Est pro custu chi s’assessoradu regionale de sos Afàrios generales at pensadu a unu pianu triennale 2026-28 de tres milliones de èuros. Su bandu punnat a sustènnere sos munitzìpios in s’istèrrida de su documentu comunale de seguridade tzibernètica. Totu custu si traduit in una mapadura istratègica pro individuare sas fartas in sos sistemas, pro prevènnere sas minetzas e garantire sa continuidade in sos servìtzios.
Sa mesura adotat unu critèriu de proportzionalidade chi tutelat sos territòrios prus fràgiles, oferende finas a 10mìgia èuros a sas biddas chi non lompent a 3mìgia abitantes e contributos chi creschent pro sos Comunes prus mannos. Gràtzias a sa collaboratzione cun sa Politzia Postale e s’Universidade de Casteddu, fintzas sas amministratziones minores ant a tènnere sas lìnias ghia pro blindare sas infrastruturas pròpias.
«Cherimus chi fintzas custas – at naradu s’assessore Sebastian Cocco – potzant comintzare unu percursu istruturadu de anàlisi, preventzione e pianificatzione de sa seguridade digitale, sena gravare in sos bilantzos comunales». Sos Entes locales interessados podent presentare dimanda petzi dae su portale Sus (Isportellu ùnicu de sos servìtzios) dae mesudie de su 15 de trìulas a mesudie de su primu de cabudanni.
