S’ierru demogràficu in Sardigna est fintzas un’ierru econòmicu. Una cumbinatzione mala chi ponet in perìgulu no atividades sìngulas ebbia, ma sèculos intreos de sièntzia artesana e identidade territoriale. Sas tintas de su cuadru chi nd’essit dae s’istùdiu de sa Cna Sardegna, “Imprese senza ricambio”, sunt sas prus iscurigosas.
A un’ala sa base impresariale est imbetzende, cun unu nùmeru semper prus artu de titulares chi nche brincant sos setanta annos; a s’àtera mìnimat sa base generatzionale de sos chi devent eredare sos benidores de sas butegas e de sas impresas minudas.
S’annu coladu sos titulares de impresas individuales sardas cun nessi setanta annos sunt lòmpidos a cuota 9.476, tochende su 10,1% de su totale regionale. Deghe annos in antis fiant 8.527, cosa chi evidèntziat una crèschida manna, de su 11,1%. In manera parallela, sas aziendas ghiadas dae giòvanos chi non lompent a sos 35 annos sunt coladas dae sas 17.491 unidades de su 2014 a sas 12.845 de su 2024.
Su chi còmplicat sa situatzione est sa mèngua de sa populatzione giovanile. Intre su 2015 e su 2026 sos residentes sardos in intro de sa generatzione 20-39 sunt diminuidos de belle 92mìgia unidades, colende dae 391.340 a 299.428, cun una flessione de su 23,5% chi rapresentat su primadu negativu assolutu intre totu sas regiones italianas.
Sas provìntzias de su Sud Sardigna, de Aristanis e de Nùgoro, pro nàrrere, òcupant sas primas tres positziones a livellu natzionale pro sa lestresa de s’ispopulamentu giovanile.
Ogros a custu iscenàriu, su presidente e su segretàriu regionale de sa Cna, Luigi Tomasi e Francesco Porcu, faeddant de «rugrada de caminu perigulosa».
S’assòtziu pedit a sas istitutziones interventos lestros cun polìticas chi punnent a sa trasmissione de impresa, un’atzessu fatzilitadu a su crèditu pro sos giòvanos chi detzident de rilevare un’atividade e cursos istruturados de formatzione e acumpangiamentu, pro chi su patrimòniu econòmicu e culturale de s’ìsula non si nch’isperdat sena possibilidade de rimèdiu perunu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
