Mancat pagu tempus pro pòdere pigare parte a su bandu Next in contu de tecnologias biomèigas. Difatis, dae mesudie de su 15 de cabudanni e finas a s’ùrtima die de s’annu imbeniente (est a nàrrere su 31 de nadale de su 2027), s’ant a pòdere presentare sas dimandas pro s’initziativa promòvida dae Sardegna Ricerche. Sa punna est sa de sustènnere s’isvilupu de innovatziones sanitàrias chi siant nessi de livellu Trl4 (Technology readiness level 4, o siat validadas in ambiente de laboratòriu) e s’acurtziamentu issoro a su mercadu.
Mirende a sa crèschida industriale, su bandu faeddat de una dotatzione initziale de unu millione e 750mìgia èuros, finantziada cun sas risursas de sa lege regionale 7 de su 2007. Pro cada progetu seletzionadu est prevìdidu unu contributu màssimu de 250mìgia èuros, a cobertura totale de sos costos ammissìbiles, chi ant a pòdere pertocare sa prototipatzione, s’amparu de sa propiedade intelletuale, finas a sos servìtzios de business development.
S’obietivu printzipale est su de acumpangiare sos resurtados de sa chirca acadèmica e pùblica cara a su mercadu, favorende sa nàschida de initziativas imprenditoriales noas in àmbitos detzisivos pro sa salude comente sa genètica, sa telemeighina, sos aparatos mèigos e sos tratamentos innovativos. Sos progetos, chi ant a pòdere tènnere una durada màssima de 24 meses (cun pròroga màssima eventuale de àteros ses), los at a dèvere presentare unu principal investigator (su chircadore printzipale, o responsàbile iscientìficu) in pare cun s’organismu de chirca pùblicu de riferimentu in Sardigna.
Podent difatis benefitziare de su contributu organismos comente sas universidades, sos entes e sos tzentros de chirca cun sede inoghe. Sa protzedura valutativa est a isportellu cun òrdine cronològicu de arrivu de sas rechestas tràmite sa prataforma Sipes. Sa documentatzione e sos modellos sunt disponìbiles in sa pàgina de su bandu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
