Semper chi non bi colet in antis cun sa motoserra ca est de impèigu a unos cantos afàrios antròpicos, b’amus unu ditzu chi contat su peus de s’òmine cando un’àrbore ruet: chi totus bi faghent linna.
Su professore Ignazio Camarda, 79 sos annos suos, est unu chi sas àrbores sardas las at istudiadas e contadas e chi, in su matessi tempus, at dedicadu parte manna de sas connoschèntzias e de sa voluntade suas pro nàrrere chi nono a sa distrutzione de su paesàgiu.
Est craru, duncas, chi nos at a mancare una figura che a sa sua in contu de amparu territoriale. Ma cun custa dispedida nemos bi faghet linna. Issu, prus a prestu, est che a sas àrbores chi cando ruent ingendrant vida noa in sos padentes.
Sa nova trista est lòmpida eris. E s’est posta in caminu in sas anderas de su litu virtuale de sas retes sotziales mescamente cun sos messàgios e sos cummentos de chie l’istimaiat.
Non si podet nàrrere chi sas redatziones teniant sos cocodrillos prontos gasi comente faghent cun sos vip chi istant una vida intrea suta sas lughes artifitziales. No, sa lughe chi issu suspiat fiat sa chi si suspint sos fundos e sas àrbores. E pro cussu est chi abarrat in custos momentos unu misturu dèghidu de tristura e de gràtzias torradas.
De su professore oranesu ite est su chi giai ischimus? Chi fiat ordinàriu de Botànica sistemàtica in su dipartimentu de Agrària in s’Universidade de Tàtari; chi fiat su referente se s’Ortu botànicu; chi aiat istèrridu s’inventàriu de sa flora de su Tzad; chi aiat fatu parte de su comitadu de coordinamentu pro sa predispositzione de sos istùdios de sos parcos naturales e de su Parcu natzionale de su Gennargentu; chi aiat coordinadu s’istùdiu de sa Carta de sa Natura de Sardigna chi aiait fundadu s’Issla (istitutu sardu de iscièntzias, lìteras e artes). E gasi àteru.
Su chi galu no ischimus est isetende·nos. In sos libros suos. In su padente de sa connoschèntzia.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
