Giòbia 14 de austu, a ora de is 9:30, sa sala de su cunsìgiu comunale de Elini at a acasagiare su cunvegnu “Elini… arrimandu su de connotu”, unu momentu de riflessione pro chistionare de su progetu de recùperu de is domos istòricas e a sa valorizatzione de s’identidade culturale de sa comunidade.
S’initziativa faghet parte de unu progetu prus mannu de amparu de su patrimòniu materiale e immateriale, chi cumprendet fintzas sa chirca genealògica fata dae Pino Ledda e publicada in su volùmene Andalas de Memoria. A oe, su Comunu de Eleini at achiridu unos cantos edifìtzios de grandu valore istòricu: sa domo de is Lais, in su tzentru istòricu, sa Domo de is Sicas (Casa Zicca) – oe sede de museos –, sa domo de is Mancas , atuale sede de sa Protetzione Tzivile, Domo Carrada-Manca (Sa domu de Siu Dàriu). Unu traballu de recùperu identitàriu ocannu arrichidu fintzas dae su progetu de toponomàstica de s’Ufìtziu Limba Sarda, cun su collocamentu de cartellonìstica bilìngue sardu-italianu in is pratzas dedicadas a figuras de importu de s’istòria locale.
Aberint su cunvegnu is operadores de s’assòtziu Artis e Sonus, chi contivìgiat s’eventu, e is de s’Ufìtziu Limba Sarda. Posca ant a intervènnere su sìndigu Pili Vitale, is erederis de sa famìlia Carrada-Manca, s’ex sìndiga Rosalba Deiana, Anna Lisa Tosciri de su G.A.L. Ogiastra, s’architetu Massimo Loi, diretore de is traballos de sa domo Carrada, Guglielmo Desiderio de s’impresa chi at esecutadu su restàuru, su cunsigeri regionale On. Salvatore Corrias, chi at a allegare de su ruolu de sa Regione in sa valorizatzione e in su recùperu de is tzentros istòricos; s’ing. Monica Stochino, Subrintendente Archeologia, Bellas Artes e Paisàgiu pro is provìntzias de Nùgoro e Tàtari, chi at a faeddare de s’importu de su recùperu de is tzentros istòricos comente trastu de valorizatzione identitària. S’istentu musicale est afidadu a Alessandro Podda a sonu de launeddas e de organitu.
A concruos, is partetzipantes s’ant a iscostiare a pee pro bisitare sa “Sa domu de Siu Dàriu”, fraigada a in antis de su 1800, in ue a èssere posta una targa bilìngue sardu-italianu. Sa die s’at a concruire cun unu cumbidu cun cosa de papare e de bufare de su logu.
Cun custa initziativa, Elini bolet preservare passadu e fintzas su benidore, parende fronte a s’ispopulamentu favorende s’ocupatzione e investende in su territòriu, in servìtzios essentziales comente s’iscola a tempus prenu, s’asilu niu, sa ludoteca e su tzentru de agregatzione sotziale, e sighende a promòvere sa cultura pro mesu de su progetu Elini Paese Museo, is fainas de su Ceas, e de s‘Ufìtziu Linguìsticu, ativu de in prus de 15 annos.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
