Sàbadu su 26 de cabudanni, dae sas 4 e mesu de borta de die, in su “Padiglione fieristico” de Santu Nigola, b’at a èssere sa tzerimònia de premiatzione de sa de sessantasete editziones de su Prèmiu Otieri de literadura sarda. Custu traguardu importante cumbinat cun sas tzelebratziones ufitziales de sos setanta annos de aficu pro s’amparu, sa promotzione e sa valorizatzione de sa limba e de sa cultura de Sardigna.
Su Prèmiu naschet difatis pro idea de Toninu Ledda su 1956, in intro de sa festa manna de sos otieresos, sa de cabudanni de su Rìmèdiu. E ocannu, a pustis de sas premiatziones atonginas de sos annos colados, sa tzerimònia torrat a su tempus suo, pròpiu una chida a pustis de sa festa nòdida. Galu no ant annuntziadu sos binchidores de sas tres setziones literàrias, ma s’Aps Premio Ozieri ghiada dae Vittorio Ledda at como dadu a ischire chie sunt sos chi ocannu retzint sos prèmios ispetziales. Su trofeu omònimu, su “Premio Ozieri”, l’otenet ocannu s’archeòloga e dotzente universitària Giuseppa Tanda, chi totus connoschent comente Peppina, figura crae pro s’insertada ufitziale de sas domus de janas in sos sitos Unesco chi sunt Patrimòniu de s’Umanidade. Tanda est fintzas autora de prus de treghentos istùdios iscientìficos. Su Prèmiu pro s’Arte lu retzit custu giru su musitzista e cumponidore Francesco “Arrogalla” Medda pro sa chirca sonora sua capatze de fùndere sa traditzione musicale isulana, dae su càntigu a tenore a s’eletrònica cuntemporànea.
Su Prèmiu pro sa Cultura est intregadu imbetzes a Alfonso Silba, pintore e iscultore de orìgine campana (istat in Orosei) e autore de traballos chi interpretant sas òperas maistras de sa literadura sarda, dae Grazia Deledda a Salvatore Satta. In fines su prèmiu “Città di Ozieri”, chi lu dant a Vanni Fadda, ex amministradore pùblicu (fintzas sìndigu de Otieri) e ex presidente de su Prèmiu, ammentadu pro s’impignu polìticu e tzivile suo chi at contribuidu a sa nàschida de su Tzentru regionale de sa Literadura Sarda. Sa tzerimònia, cun diretzione artìstica de Marco Fenudi (segretàriu atuale de su Prèmiu) l’at a conduire Piersandro Pillonca.
