Su summit fatu in Alaska carchi cosa l’at narada giai a sa vigìlia sua. Cussu territòriu Usa, a nord-Ovest de su Cànada, finas a su 1867 faghiat parte de s’imperu russu. Sos istados unidos lu comporeint pro 7 milliones e 200mìgia dòllaros. Comente a nàrrere: sas làcanas si podent mudare, e finamentas faghende·bi cussos afàrios chi nche sunt semper in sa conca e in sos faeddos làdinos de Donald Trump.
Làdinu imbetzes no est su cuadru de su chi nd’est essidu dae custu atopu de presidentes: Putin no at otènnidu sas cuntzessiones territoriales pedidas pro sessare su fogu (sa responsabilidade la dant como a Zelensky) e Trump no at otènnidu custu. Però ambos duos faeddant de passos a dae in antis. «Prus chi non profetosu», at naradu the Donald mandighende·si sas paràulas de pagas dies a como: «No mi nde cuntento si dae cussu summit mi nch’apo andare sena una cale si siat forma de trègua». Sa versione agiornada – cun s’americanu bisende·si su Nobel – est chi “punnamus a sa paghe, no a sessare su fogu ebbia”.
Est duncas una vitòria de Putin sa chi si contat, chi in su mentres est avantzende in Ucraina semper de prus. Carchi parallelu prus a giosso b’est imbetzes sa chistione palestinesa, cun Netanyahu chi at annuntziadu de ocupare Gaza e de chèrrere una Grandu Israele (mancari custu potzat èssere unu bluff pro si nche pigare de su totu “petzi” sa Tzisgiordània in prus de cussu chirru infustu dae su mare e dae su sàmbene). Duncas diat èssere un’errore a bìdere custas acontèssidas internatzionales partzidas s’una dae s’àtera. E, a su chi ant cunfirmadu dae s’ufìtziu de su primu ministru de Israele (duncas cherende·lu fàghere ischire) Netanyahu sas dies coladas at telefonadu a Putin.
Est craru duncas chi dae Tel Aviv sunt chirchende si no un’agiudu nessi una non belligeràntzia fintzas dae Mosca. Peruna novidade: in una sessione Onu de su 24 de freàrgiu de ocannu Israele aiat votadu in pare cun sos Istados unidos e Rùssia contra a sa cundenna de s’invasione de s’Ucraina. E cun sa crisi iraniana Putin (a pustis de l’àere fatu cun Assad) at lassadu sola sa repùblica islàmica faghende·si garante de su disarmu nucleare de Teheran. No est craru si sos efetos de custu summit los amus a bìdere in antis in Ucraina o in Palestina.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
