“Jennifer, apu lìgiu un’intervista tua in Vanity Fair in nue naras chi ses cichendi una citadi pitica po bivi in Italia. Unu logu in nue papai cosas bonas e ti gosai su soli totu sa die”. No est una brulla, beridadi est. Dd’at iscritu su sìndigu de Casteddu, Paolo Truzzu, in nd’una lìtera imbiada a Jennifer Lopez, cantanti meda connota in totu su mundu.
Su sìndigu at invitau sa cantanti descriendi sa bellesa de sa citadi: “Innoi agatas totu cussu chi ti serbit, sa genti est trancuilla, no segat sa conca e arrespetat sa privacy. In prus teneus un’aeroportu chi funtzionat bene meda, aici cando bolis podis movi. Nci funt puru logus po iscoberri s’istòria e sa cultura nosta e ocannu in Casteddu teneus puru atrus eventus de importu comente is garas de s’Amèrica’s Cup, mustras e comente sempre nc’at a essi Sant’Efis. Est su primu de su mese de maju”.
Sa lìtera, publicada in Facebook e dae is giornalis, at intzediau meda genti chi at incumentzau a pigai in giru su sìndigu narendi chi diat dèpiri pensai a arresolvi su problema de s’àliga e atras cosas invecis de pensai a una cantanti. De prus, sunt essidas, una a pitzus de s’atra, una pariga (a sa sarda) de figuras (‘meme‘ in inglesu) chi brullant su sìndigu in paris cun sa Lopez. S’idea de Truzzu, comente fiat normali a nci pensai, at allutu sa polèmica de su centrumanca chi at chistionau de pagu coerentzia de su sìndigu, po ite finas a una pariga de chidas fait naraiat chi sa citadi fiat caddotza e cun problemas de seguresa.
Immoi tocat a abettai po cumprendi si s’ispera de Truzzu at a abarrai lìtera morta o puru, chini ddu scit, at a portai Jennifer Lopez in Casteddu in paris cun Sant’Efis. Unu miràculu?
