Is furones de arena Cun su cumentzu de s'istajone turìstica torrant puru is furas de arena dae is marinas de sa Sardigna.

Semus giai in su mese de argiolas e ocannu custa est sa prima borta chi torrat a pìgiu sa chistione de is ladrones de arena: gente chi lompent a is marinas de s’ìsula nostra comente turistas, prus che totu istràngios, e cando contòniant a domo chircant de si nde leare a iscùsia botes de arena in is valìgias issoro.

E difatis sa serrada cumandada dae su coronavirus, cun totu is problemas chi at batidu a su turismu, at limitadu peri su fenòmenu lègiu chi semus averguende dae una pariga de annos a oe. Comente ant abertu torra is bolos natzionales e internatzionales, in deretura dae is marinas nostras ant cumentzadu a mancare arena e còtzulas. Sa cunfirma arribat dae sa pàgina Facebook ‘Sardegna rubata e depredata’ chi oe at publicadu is primas fotografias tiradas in s’aeroportu de Casteddu – Su Masu. Gràtzias a is controllos de is bagàllios sunt istados recuperados belle 70 chilos de cosa furada.

In is fotos si bient iscàtulas prenas de arena, pedras e còtzulas leadas mescamente in is areniles de su sud Sardigna. “No ischìamus cando diat èssere torradu a cumentzare ma fìamus seguros chi custu vìtziu non diat èssere passadu de moda”, iscrient in ativistas in sa Retza e sighint “unu pagu in ritardu ma custa puru at a èssere un’istajone prena de prègiu”.

Meda persones chi arribant in Sardigna pro is fèrias no ischint chi collire còtzulas e arena dae sa plaja est proibidu dae sa lege, s’arriscant puru contraventziones lègias. Àteros imbetzes dd’ischint ma si dda provant etotu. Is unos e is àteros non cumprendent chi custos cumportamentos noghet meda a s’ambiente pro ite càusant s’erosione de is plajas: custu fenòmenu est dannosu prus che totu pro cussas prus piticas chi cun su colare de su tempus arriscant de iscumpàrrere pro semper.

L. M

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*