Ant impreadu nessi unu chilu de esplosivu e aiant pòdidu mòrrere a sa fìgia chi aiat in pessu parchegiadu serente a sa vetura sua. A sas 10 de note de giòbia su tzocu. Sigfrido Ranucci, condutore de Report, at retzidu duncas un’avertimentu chi podiat èssere mortale. Est issu etotu, intervistadu dae su Corriere, chi faeddat de «unu clima de isulamentu e de delegitimatzione» in sos cunfrontos suos. «Sos ùrtimos meses apo retzidu minetzas, totu cantas ogetu de denùntzia: mi nch’ant imbiadu una balla de P38, is de s’iscorta mea ant identificadu a chie mi fiat sejende, m’ant dossieradu finas in foras de Itàlia».
Ranucci non tenet idea in contu de responsàbiles ma non nche bogat sa «cointzidèntzia cun s’annùntziu de pagas dies a como de sas inchiestas noas de Report». Dae sa ricostrutzione de Open leghimus chi as primas ballas a domo sua sunt lòmpidas a pustis de una puntada chi faeddaiat de sa morte de Piersanti Mattarella (duncas de màfia e de eversione fascista). E chi «b’at un’ùrtimu episòdiu chi at ingendradu minetzas». Mentovadu su su servìtziu de su mese de santandria de s’annu coladu in contu de «indùstria bèllica e de cybersecurity israeliana in ue si faeddaiat de Gaza e de armas de Israele».
In totu custos annos Ranucci at retzidu assàchios fintzas dae su mundu de sa polìtica. Pensemus a sa cuerela retzida a concruos de sa legisladura colada dae Fratelli d’Italia pro sa puntada in ue si faeddaiat de sos raportos de su babbu de Giorgia Meloni cun su boss Michele Senese. Semper dae su partidu de dereta (in custu casu dae su sutasegretàriu Giovanbattista Fazzolari e dae su cabu de gabinetu de Meloni Gaetano caputi) retzeit cuerelas pro s’inchiesta chi faeddaiat de su ruolu chi diat pòdere àere àpidu su guvernu in s’iscalada de Mediobanca dae parte de Monte Paschi.
Cheret mentovadas fintzas sa cuerela de sa segunda càrriga de s’istadu Ignazio Benito Maria La Russa e de fìgios suos; sa cuerela de su ministru Giancarlo Giorgetti, de sa mùgere e de sa connada; sa denùntzia de su ministru Adolfo Urso; sa de sa ministra Daniela Santanché e de s’ex cumpàngiu suo; sa da sa sutasegretària Isabella Rauti; sas de sa famìlia Berlusconi e de Marta Fascina; su show de Maurizio Gasparri cun “cordiale” e carota in s’auditzione in Vigilàntzia; sa cuerela de Matteo Renzi pro su servìtziu chi lu faghiat bìdere in autogrill in pare cun un’agente de sos servìtzios.
Semus faeddende duncas de inchiestas chi ant interessadu ambos sos ischieramentos. Como sa polìtica pranghet e fintzas dae dereta b’at propostas, che a se de Francesco Storace, de retirare totu sas cuerelas contra a issu. Tzertu si diant pòdere retirare fintzas sas ingiùrgias publicadas dae carchi ex giornalista sardu chi l’at definidu “losco figuro” lassende (in nùmene de su free speech) cummentos de casta fintzas peus (“Ranucci di m***a!”).
Ma s’atentadu est petzi sa punta de s’iceberg de unu fenòmenu prus mannu e fundudu. Cunforma a sos datos de Ossigeno per l’informazione nche lompent a 7550, dae su 2006 a oe, is giornalistas minetzados. Una mèdia de 478 cada annu. Su bonu de custas minetzas las contamus in su Làtziu cun 1160 traballadores interessados. Sighint in sas primas bator regiones sa Campània (621), sa Sitzìlia (483) e sa Lombardia (465). Ocannu semus fintzas registrende una crèschida cun unu +78% cunforma a su matessi perìodu de su 2024.
Pro su chi pertocat sa natura de custas minetzas contamus unu 41% de avertimentos, unu 14% de assàchios, unu 4% de dannos e unu 4% de impedimentos de s’atzessu a s’informatzione. Ma b’at unu datu chi cheret bidu in sa particularidade sua. Su 37% de custas minetzas pertocat sas denùntzias penales cun pretestu e sas atziones tziviles temeràrias: s’acrònimu in inglesu est Slapps e sunt atziones chi su prus de sas bortas interessant a is cronistas chi traballant pro sos mèdios locales, belle semper privos de cuntratu e de cobertura finantziària dae parte de s’editore.
Pro custos giornalistas precàrios, mancari non si sigat a dae in antis o b’apat assolutzione pro su 90% de sa bias, su protzedimentu durat annos intreos cajonende dannos a su traballadore. A su chi at fatu sa càusa, a concruos de totu, non b’at peruna cunsighèntzia negativa; petzi sa resèssida de pònnere su bavàlliu a chie daiat novas iscòmodas.
