Est colada a s’unanimidade in Cussìgiu regionale una motzione pro s’ativatzione de su Registru de is Tumores, istituidu in su 2012. Como tocat a sa Giunta Todde bortare sa deliberazione in un’atu cuncretu.
A pustis de annos ritardos, su Registru Tumores de sa Sardigna torrat a su tzentru de s’agenda sanitària regionale. Su Cussìgiu regionale at aprovadu a s’unanimidade una motzione chi impinnat sa Giunta ghiada dae Alessandra Todde a cumpletare s’ativatzione de custu trastu fundamentale pro su compudu de is patologias oncològicas in s’ìsula. Su providimentu, presentadu dae is cussigeris de “Uniti” Giuseppe Frau, Sebastian Cocco e Valdo Di Nolfo e sustentadu dae totu is fortzas polìticas presentes in àula, tenet sa punna declarada de garantire su funtzionamentu efetivu de su Registru Tumores Regionale de sa Sardigna (Rtrs) e istituire unu comitadu sientìficu incarrigadu de nd’averguare calidade, eficatzidade e protocollos operativos.
Su Registru, istituidu prus de deghe annos a oe cun sa lege regionale 21/2012, no dd’ant ativadu de su totu. Como, difatis, resurtant ativos is registros locales de su Nord Sardigna e de sa Sardigna Tzentrale ebbia – operativos dae su 1993 e dae su 2002 – ambos duos acreditados a livellu natzionale. Mancat su registru de su Sud Sardigna, mai ativadu in manera ufitziale e galu sena reconnoschimentu.
Segundu su modellu organizativu prevìdidu, su Rtrs si basat subra un’istrutura federada cun tres registros territoriales coordinados dae una cabina de regia tzentrale. Unu mecanismu chi, una borta cumpletadu, diat permìtere un’elaboratzione trasparente, integrada e bàlida in manera sientìfica de is datos oncològicos. Sa situatzione epidemiològica de s’ìsula donat pensamentu. Is tumores, difatis, sunt sa primu càusa de morte in Sardigna, cun in prus de 5.200 mortes in su 2021 ebbia, uguale a su 33% de su totale, una pertzentuale prus arta de sa mèdia natzionale. Unu datu chi apilurtzat ca carena e chi solletzitat sa netzessidade de si dotare de trastos eficatzes pro analizare, prevènnere e gestire su fenòmenu.
Sa motzione aprovada previdet fintzas sa creatzione de unu comitadu sientìficu regionale, chi at a tènnere su còmpitu de indiritzare e compidare sa faina de su registru, controllare sa calidade de sa regorta de is datos. A afortiare s’atzione, una clàusola proposta dae su cussigeri de opositzione Fausto Piga (FdI): intro 90 dies sa Giunta regionale at a dèvere presentare una relatzione pro averiguare s’istadu de atuatzione de sa motzione in Cummissione.
In s’interventu suo, s’assessore a sa Sanidade Armando Bartolazzi at ammìtidu chi is ritardos sunt frutu de una “ arretradesa istruturale de su sistema”. In prus at naradu de bòlere ativare unos cantos interventos operativos, interessende deretu ARES Sardegna. Su progetu at tentu giai su pàrrere favorèvole de su Garante pro s’amparu de is datos personales, chi at aprovadu is mesuras prevìdidas pro sa seguridade de is informatziones: pseudonimizzazione, istàgiu de is datos anagràficos de is datos sanitàrios e adotzione de protocollos informàticos seguros.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
