A pustis de sa resèssida manna de sa prima editzione de s’annu coladu, su Parcu iscientìficu e tecnològicu de sa Sardigna, in Pula, at a èssere torra sa sede de sa Scientific school ‘Nmr in Drug Discovery’, custu giru intitulada ‘From Structure to Function’. S’apuntamentu est dae su 29 de cabudanni a su 2 de santugaine in s’edifìtziu 2 de s’istrutura de Sardegna Ricerche, s’ente sardu pro sa chirca e s’isvilupu tecnològicu ativu dae su 1989.
Promòvidu pròpiu dae Sardegna Ricerche in pare cun Porto Conte Ricerche e cun su patrotzìniu de su Gidrm (Gruppo italiano discussione risonanze magnetiche), su cursu oferit una formatzione avantzada teòricu-pràtica pro su chi pertocat s’impreu de s’ispetruscopia de risonàntzia magnètica nucleare (Nmr), metodologia-crae pro cumprèndere sas interatziones biomoleculares e pro ghiare s’aprontu de meighinas noas.
Su programma previdet s’istùdiu de sos fundamentos Nmr ma fintzas s’achirimentu e s’interpretatzione de esperimentos omonucleares e eteronucleares cun in intro sos nùcleos de importu biomèdicu prus mannos e sos cuntzetos-crae de s’ispostamentu chìmicu (“chemical shift”), de sa croba iscalare (“j-coupling”) e de rilassamentu longitudinale e trasversale (T1 e T2). Atentzione particulare l’ant a dedicare a sas tècnicas Nmr pro s’istùdiu de sas interatziones biomoleculares proteina-ligando (movende dae s’osservatzione de s’una o de s’àteru) chi règulant su reconnoschimentu moleculare.
In prus de sas letziones teòricas sunt prevìdidas esercitatziones pràticas in ue sos istudiantes ant a traballare cun un’istrumentu Nmr 400 MHz, cun pachetes de datos isperimentales e casos-istùdiu gràtzias a aplicativos modernos, pighende familiaridade cun s’achirimentu, s’elaboratzione, s’anàlisi e s’interpretatzione de sos ispetros NMR. In fines, sas sessiones pràticas ant a favorire un’interatzione direta cun dotzentes prus chi non cualificados e cun esperièntzia manna in su setore, fatzilitende su cunfrontu, sa discussione e s’aprofundimentu personalizadu de sos argumentos.
Indiritzada a istudiantes, dotorandos e chircadores pùblicos e privados, s’iscola contat sa presèntzia de relatores comente Daniel Oscar Cicero (Universidade “Tor Vergata” de Roma), Alfonso Mangoni (“Federico II” de Nàpoli), Cristina Airoldi (BioOrgNMR Lab), Luigi Russo (“Luigi Vanvitelli” de sa Campània), Angelo Gallo (Universidade de Torinu) e Gianluca D’Abrosca (de Fògia). Sas dimandas de partetzipatzione cherent imbiadas intro de su 29 de austu.
