Afortiare s’amparu, sa valorizatzione e sa promotzione de sa limba sarda e agiornare is trastos pro s’imparu suo. Cun custas punnas sa Giunta regionale at inghitzadu su percursu pro donare atuamentu prenu a is organismos prevìdidos dae sa lege regionale n. 22 de su 2018 in contu de polìtica linguìstica regionale.
Pro proposta de s’assessora de sa Pùblica Istrutzione, Benes Culturales, Informatzione, Ispetàculu e Isport, Ilaria Portas, s’esecutivu difatis at dispostu s’inghitzu de is interlocutziones cun su Cunsìgiu regionale e cun is organismos e is istitutziones individuados dae sa normativa pro achirire is dessinnatziones de is cumponentes de sa Consulta de su sardu, prevìdida dae s’artìculu 8 de sa lege 22. In su matessi momentu sa Giunta at dispostu sa torrada de s’Obreria pro s’imparu de su sardu, su comitadu interistituzionale permanente prevìdidu dae s’artìculu 16 de sa matessi lege, dedicadu a su coordinamentu de is fainas de insignamentu de is limbas de is minorias istòricas.
“Semus dende inghitzu a duos trastos de importu de sa polìtica linguista sarda”, ispiegat s’assessora de sa Pùblica Istrutzione, Benes Culturales, Informatzione, Ispetàculu e Isport, Ilaria Portas. “Seguru si tratat de un’ocasione manna pro s’ispàinu de sa limba nostra in sa sotziedade e in s’iscola”.
Is duos interventos s’insertant in su cuadru de is polìticas regionales pro s’amparu e sa valorizatzione de su patrimòniu linguìsticu de sa Sardigna, chi cumprendet, in prus de su sardu, su catalanu de S’Alighera, su gadduresu, su tataresu e su tabarchinu.
Sa Consulta de su sardu at a tènnere s’incàrrigu de contribuire a sa definitzione de sa grafia de sa limba sarda e at a èssere cumpostu dae rapresentantes de is istitutziones, de is autonomias locales, de is universidades e de espertos de su setore. Pro nde cumpletare sa cumpositzione at a èssere publicada una manifestatzione de interessu pro su sèberu de sete espertos in is àreas de sa limba sarda, de sa linguìstica sarda, de sa didàtica de is limbas, de sa literadura e filologia sarda, de s’impreu de is limbas in sa comunicatzione e in s’informatzione, de su campu artìsticu e de sa comunicatzione digitale. Is àteras chimbe figuras de cumpetèntzia regionale ant a èssere individuadas in su moderadore de su setore responsàbile pro sa limba sarda e in is funtzionàrios espertos de s’Amministratzione regionale.
Pro su chi pertocat sa ricunvocatzione de s’Obreria pro s’imparu de su sardu, at a èssere agiornadu e adeguadu a tenende contu de cambiamentos acontèssidos in su cuntestu sotziolinguìsticu de sa Sardigna e de is obietivos definidos dae su Pranu de polìtica linguìstica regionale, su protocollu de acordu cun s’Ufìtziu iscolàsticu regionale aprovadu in su 2020. Pro more de custu, su Servìtziu cumpetente at a aviare is tratativas cun is ateneos de Casteddu e Tàtari pro achirire is dessinnatziones netzessàrias a s’ativatzione de is fainas de s’organismu.
