Sàbadu 24 e domìnigu 25 de mese de ladàmine sa bidda a làcana intre Barbàgia e Ogiastra s’ànimat pro sa de XXVIII editziones de sa Sagra de sa Mela. Una die intregada a sa cultura, a sa memòria e a s’arte, acumpangiada de sa mùsica de Gavino Murgia.
S’atòngiu in Ussassa tinghet de is colores caentes de sa traditzione, cun sa torrada de unu de is addòbios prus isetados de su territòriu: sa Sagra de sa Mela, lòmpida ocannu a sa de XXVIII editziones. S’eventu, in programma pro sàbadu 24 e domìnigu 25 de mese de ladàmine, s’insertat in intro de sa Die Natzionale de su Bai (Burgos Autènticos de Itàlia), sutaliniende s’acàpiu intre sa valorizatzione de is produtos tìpicos locales e sa promotzione de su patrimòniu culturale de is biddas minores.
Sa giorronada de su 24 s’at a abèrrere in manera ufitziale a ora de is 9:30 cun unu momentu de grandu significadu tzìvicu: s’inchingiamentu de sa Biblioteca Cumunale. Su logu seberadu pro acasagiare custu tèmpiu nou de su ischire no est casuale, ma simbòlicu meda: sa biblioteca, difatis, at a abèrrere in is locales de s’iscola elementare betza. Si tratat de unu singiale importante pro sa bidda: sa torrada a sa tzitadinàntzia de unu logu dedicadu a sa cultura e a s’educatzione cun una punna noa, sa de promòvere sa letura e sa coesione sotziale.
A is oras 10, in su tzentru Polivalente de Cobingiu, paris cun Antonella Angioni de Slow Food, a sa sotziòloga Aide Esu e a is espertos de Laore, ddoe at èssere su cunvegnu “Il valore delle terre alte“. Ant a èssere fintzas is pitzinnas e is pipios de Ussassa chi ant a ammustrare is traballeddos issoro dedicados a sa ‘sennora Mela’ .
A merie, a is oras 17:00, inauguratzione de su Belvedere, est a nàrrere su craru de Serra ‘e Lugi, chi at a èssere intituladu a Maria Lai, s’artista de Ulassa chi cun is fainas suas ant ischidu atritzare in manera indissolùbile is filos de sa memòria, de sa natura e de sa comunidade.
Colunna sonora de sa tzerimònia de inchingiamentu at a èssere sa mùsica de Gavino Mùrgia. Su polistrumentista e cumposidore, nòdidu pro is sonos antzestrales suos chi amesturant su jazz a is raighinas fungudas de sa traditzione sarda, at a dialogare in manera ideale cun s’ispìritu de Maria Lai, incantende is presentes in su craru de Serra ‘e Lugi.
Domìnigu 25 at a èssere dedicadu a is sabores, a sa mùsica e a is traditziones de sa Sardigna. Su programa s’at a abèrrere a is 10:30 cun su laboratòriu didàticu “Fermentamela”, dedicadu a s’amadrigadura de sa mela e de su càule ocupadu. A is 12:00, su tzentru istòricu at a acasagiare s’esibitzione in caminu de su Coro Ardasai de Seui. A merie, a is 17:00, ant a essire is caratzas de s’assòtziu Janas e Amaymonaus de Irbono.
In sa locandina su programma cumpletu:
