A pustis de sa resessida de su primu addòbiu, Uri acasàgiat su segundu Addòbiu Genealògicu Sardu, in programa pro sàbadu su 18 de santugaine 2025 acanta sa Biblioteca Comunale “G. M. Cherchi”. S’eventu, promòvidu dae s’Assòtziu Genealògicu de sa Sardigna, bolet èssere unu momentu nou de cunfrontu e aprofundimentu pro chie disìgias printzipiare o sighire su biàgiu dèchidu a s’iscoberta de sas orìgines familiares suas.
Su primu Addòbiu Genealògicu Regionale Sardu, a tìtulu “A sa chirca de sas raighinas nostras”, l’aiant ammaniadu semper in Uri su 26 de santugaine 2024 in s’àmbitu de s’Annu de su Turismu de sas Raighinas e de su progetu Zente de Coros. Sa die, cun prus de sessanta presèntzias intre partetzipantes, reladores e organizadores, unidos dae su disìgiu de torrare a costrùere àrbores genealògicos e afortiare su ligàmene cun s’istòria familiare pròpia.
S’ddòbiu de su 2025 s’insertas in su matessi surcu de su 2024. Durante sa die sunt prevìdidos interventos de espertos, frailes pràticos e momentos de iscàmbiu intre amantiosos de sa matèria. Ant a èssere acraridos sos mètodos pro fraigare un’àrbore genealògicu, detzifrare documentos antigos, compudare archìvios tziviles e parrochiales, e cumprèndere s’importu de sa genealogia comente trastu de connoschimentu istòricu e identitàriu.
S’interessu pro sa genealogia in Sardigna est crèschidu in sos ùrtimos annos, fintzas gràtzias a s’initziativa de duas giòvanas de Cabuderra, Elisa Melis e Valentina Vincis. Movende dae una chirca personale subra de sas famìlias pròpias, ant fundadu in su 2018 su grupu Facebook Albero Genealogico Sardegna. In pagos annos sa communidade est devènnida unu puntu de riferimentu pro chie cheret torrare a cumpònnere su passadu suo.
Sa genealogia est s’istùdiu e sa ricostrutzione de sas lìnias de discendèntzia e de sos ligàmenes familiares pro mèdiu de fontes istòricas, documentos de archìviu, àutos tziviles e parrochiales, registros notariles e àteros rastros iscritos. In Sardigna, ue s’istòria locale e sos ligàmenes familiares a s’ispissu s’imbestit cun eventos migratòrios, leges, costumàntzias particulares e cambiamentos amministrativos, custa disciplina assumet un’importu ispetziale.
Sas istòrias chi nde essint a foras dae sos paperis antigos, a s’ispissu sunt ispantosas: cojos cun dispensa eclesiàstica, casos de crònaca niedda o finas de incuisidores ispagnolos arribbados a Sardigna pro incuisire brùgias e majargias. Cada iscoberta devenit unu bucone chi torrat a cumpònnere siat s’istòria de una famìlia, siat sa de sa comunidade isoluna.
Su II Addòbiu Genealògicu Sardu a Uri naschet semper cun sa punna de avalorare s’interessu in contu de genealogia, creende un’ispàtziu fìsicu pro chie, a fitianu, si cunfrontat in lìnea ebbia.
Pro connòschere totu su programma, comporare sos billetes e pro nde ischire de prus in trade in su giasu internet www.genealogiasardegna.it o in sa pàgina FB de s’assòtziu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
