Su museu de Orane tzèlebrat Antine Nivola e New York, sa segunda domo de s’artista sardu. Ddu faghet cun una mustra dae su tìtulu “Dallo Showroom Olivetti alla Città incredibile” giai aberta dae su 15 de abrile e chi at a acollire sos bisitadores finas a su mese de trìulas.
Nivola aiat mòvidu dae s’ìsula in su 1939 a pustis de èssere istadu pessighidu dae su regìmene italianu pro more de sas ideas anti fascistas. In paris a isse nche fiat puru sa cumpangia Ruth Guggenheim de orìgine ebràica. Sa metròpoli de sos Istados Unidos aiat influentzadu meda su traballu artìsticu de Nivola.
Est de su 1954 un’òpera de importu de s’artista de Orane. Dd’aiat realizada pro s’azienda italiana de s’Olivetti chi teniat una butega manna in sa Fifth Avenue un’arborada famada de New York. Inoghe Nivola aiat realizadu unu cuadru, artu bintitres metros e largu chimbe metros, cun una tennica particulare, mutida de su ‘sand casting’, gràtzias a sa cale fiat arrenneschidu a disinnare subra a s’arena.
Custa òpera chi oe est cunservada in Harvard ma su museu de Orane in paris cun su Crs4, su Cnr, sas Universidades de Tàtari e àteros entes ant realizadu una copia impreende tecnologias noas comente s’imprenta in 3D, su ‘visual computing’ e su ‘videomapping’ e dd’ant posta a disponimentu de sos bisitadores de su museu pro dda bìdere. Sa mustra presentat puru àteras òperas de disegnos de Nivola.
