Biddamanna Strisàili acasàgiat “JUNTOS 2025”: sa de dòighi editziones de su torneu internatzionale de sa “strumpa”: isport, traditzione e identidade dae su 7 e a s’8 de austu
Su 7 e s’8 austu 2025, in ocasione de sa de dòighi editziones de su Torneu Internatzionale “JUNTOS 2025”, Biddamanna Strisàili at a retzire atletas de Islanda, Inghilterra, Iscòtzia, Bretagna, Iràn e Sardigna pro duas dies intregadas a s’isport, a sa cultura e de s’amighèntzia. Abrontada dae s’A.S.D. Sa Strumpa, in collaboratzione cun su Comunu de Biddamanna Strisàili. Pro Loco, Comitadu Giovanile, Grupu Folk e leva de Santu Crabiele 2025, sa manifestatzione est insertada in intro de su programa de sa Sagra de Is Gàthulis, lòmpida a sa de 26 editziones.
Su faeddu “istrumpa”, benit dae su verbu “istrumpare” (betare a terra). Si tratat de una luta connota dae semper in is biddas de sa Barbàgia e de s’Ogiastra. Podimus nàrrere chi fiat s’isport de is pastores sardos, ma finas una manera de ameddare e de s’ispassiare, màssimu in ocasione de tundimentas e ispuntinos. Ma peri cando si moviat a bisita de leva is pitzocones costumaiant a provare is fortzas gherrende a s’istrumpa cun is de is àteras biddas e ognuna aiat su campione suo. Su chi contat in s’istrumpa no est sa sa carena ebbia, ma prus a prestu sa manera de acafare s’aversàriu e is tècnicas pro ddu betare a terra. S’istrumpa, disciplina reconnota in manera ufitziale de su CONI e sustentada dae sa FIJLKAM Sardegna, oe est fintzas unu trastu poderosu de valorizatzione culturale e identitària e de amighèntzia intre is pòpulos.
Pro s’ocasione, difatis, is biddamannesos ant a abèrrere a in donu is domos issoro pro retzire is rapresentàntzias istràngias chi ant a leare parte a s’eventu. JUNTOS, chi in ispagnolu signìficat “paris”, est meda prus de unu tìtulu: est unu messàgiu de amistade, diàlogu e respetu. «S’isport podet èssere unu ponte intre culturas diferentes – ispiegant is organizadores – e gràtzias a s’istrumpa bolimus trasmìtere valores de collaboratzione, paridade e abertura». S’initziativa promovet siat sa cumpetitzione, siat s’iscàmbiu sotziale e interculturale intre comunidades chi, mancari siat a largu meda tra issas (ocannu nche ant a èssere gherradores iranianos puru), cumpartzint traditziones sìmiles e raighinas comunas.
Su programa printzìpiat su 7 de austu a merie, cun s’essida de is grupos folclorìsticos de Biddamanna Strisàili, Ollolai, Sòrgono, Santu Pantaleo, Tertenia. Signint su Tenore Santa Bàrbara de Biddamanna e su Coro Amistade. A note tocat a Massimo Pitzalis, cun s’ispetàculu musicale “A Ballare”. A concruos, ballos sardos in pratza cun s’organitu de Fabio Scudu.
Su torneu beru cumentzat s’8 de austu a is ses de merie in patza de crèsia, a pustis de sa pesadura de is gherradores, dae is 8 a is 12 de mangianu in sa palestra de Barioce. Is disafios s’ant a acumprire in pitzu de su mantalafu regulare, dirìgidos dae un’àrbitru tzentrale e duos a costadu. Sunt prevìdidas medàllias pro is primos tres classificados (oro, prata e brunzu) e reconnoschimentos ispetziales pro mèritos tècnicos e isportivos.
Pro s’iscrìere est a mandare sa dimanda a s’indiritzu strumpasardegna@yahoo.com paris cun documentu de identidade, tzertificadu mèdicu agonìsticu e possìbiles atestatziones de afiliatzione a federatziones reconnotas dae su CONI. Pro pòdere partetzipare est pretzisu a rispetare is règulas e sa curretesa isportiva, pena s’esclusione.
Pro nde ischire de prus:
329 8515062
strumpasardegna@yahoo.com
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
