Su fronte de su “No” est balangende terrinu in sos sundàgios referendàrios. Su proite de sa novidade de sas ùrtimas oras est duncas servidu a s’allega. Ca est in custu datu chi podimus sebestare sas presses de sa majoria cunservadora italiana in contu de lege eletorale. Presses e netzessidades.
Postas a banda sas riformas de su premieradu e de s’autonomia diferentziada, su guvernu Meloni est iscudende sa mirada a su die a pustis de sa cramada sua pro su “Sì”. Si bincherent sos contràrios a sa riforma Nordio e s’opositzione agataret fortzas in custu resurtadu, possìbile chi s’èsitu de sas eletziones noas non b’assimiget a su de cabudanni de bator annos a como.
Est pro custu chi bi cheret unu prèmiu de majoria pro garantire s’istabilidade. Traduidu: pro abarrare a caddu. Su Stabilicum (ispètzia de fantasia a pustis de su Mattarellum, de su Porcellum e de su Rosatellum) previdet unu prèmiu de 70 sègios a chie otenet nessi su 40% de sos votos. Sa polìtica si faghet torra trapera pro cosire una beste sa prus dèghida. Pro su sistema de poderiu. Non pro unu pòpulu chi pro l’acurtziare a sas urnas bi cheret àteras medidas e non sa lege eletorale ennèsima.
Como però andemus·bi a bellu cun sas previsiones, ca si est beru chi ant istèrridu una proposta, est beru finamentas chi bi cheret tempus a l’aprovare. E est beru chi in antis de sos resurtados de su referendum non totu si podet antitzipare. E fintzas ca b’at duas cunditziones presentes chi non nche cherent istesiadas dae s’arresonu.
Sa prima est chi s’opositzione est dèbile e non galu pronta (in contu de leader e de programmas) a cumpètere; sa segunda est chi su guvernu Meloni, mancari si nàrgiat chi siat su prus istàbile, in custa legisladura at pedidu sa fidùtzia prus de 100 bortas a su parlamentu.
E si pediret sa fidùtzia a sos italianos coladu su referendum pro mèdiu de eletziones antitzipadas?
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
