In Casteddu b’at una banda musicale noa. Si mutit “Free Soul Band”, est ùnica in su gènere suo: totu sos cumponentes de su grupu sunt presoneris de su càrtzere de Uda e finas a pagos meses a oe no ischiant mancu lèghere sas notas musicales. A s’agabbu de maju imbetzes sos deghe noos musicantes si sunt ammustrados cun sassòfonos, trumbas, bassu tuba, euphonium, bateria chi ant imparadu a sonare gràtzias a su progetu “Sa mùsica andat ultres”.
Si tratat de un’initziativa aviada dae su Cpia – s’iscola de su càrtzere – cun sa Banda musicale de Muristeni. Ghiados dae su mastru Alessandro Cabras, su grupu at debutadu in sa biblioteca de su càrtzere e como sa punna est cudda de fàghere unu cuntzertu a foras de sa presone. “Dae s’annu chi at a bènnere at a èssere possìbile s’iscrìere a iscola e arribbare a su diploma”, at annuntziadu Giuseppe Ennas, dirigente de su Cpia, chi at presentadu sos percursos aviados cun s’istitutu alberghieru Azuni e cun s’Ipsia Meucci de Casteddu.
“Nemos de sos pitzocos ischiat lèghere sa mùsica, nemos de issos connoschiat sos istrumentos. Amus istudiadu notas e solfègiu, in pagu tempus ant megioradu meda”, at sighidu Cabras chi at fatu sas letziones paris a sos dotzentes de mùsica Andrea Desogus e Daniele Deias.
Su cuntzertu s’est abertu cun unu branu originale de unu detenudu, pro sighire cun unu repertòriu chi andat dae Presley a Armstrong, finas a sos Ramones e a branos traditzionales. S’esibitzione s’est serrada cun ‘L’inno alla gioia’ de Beethoven. “So orgolliosu de sos progressos fatos dae sos pitzocos. Sa mùsica faghet miràculos”, at sutaliniadu su diretore Marco Porcu.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
