Dae s’8 de argiolas a su 1 de austu sa de XIV editziones de su “Festival della Letteratura di Viaggio DH. Lawrence”. S’eventu, chi ruet in ocasione de su tzentenàriu de su biàgiu de Lawrence in Sardigna, est promòvidu dae sa rete de is Comunos de Mandas (capufila), Làconi, Ìsili, Serri, Nuradda e Sòrgunu, cun s’agiudu e sa Fundatzione de Sardigna, de sa Regione Autònoma de sa Sardigna – Assessoradu de sa Pùblica Istrutzione e de s’Arst e de su Touring Club Sardegna.
Su Fèstival est aparitzadu dae s’Assòtziu Entes Locales pro is Atividades Culturales e de Ispetàculu: sunt prevìdidos medas apuntamentos tra Trexenta, Sarcidanu e Mandrolisai, logos chi in su 1921 s’iscritore inglesu e sa mugere Frieda, in biàgiu tra Mandas e Sòrgunu, aiant ammiradu dae su fentaneddu de su trenu.
Si printzìpiat s’8 de argiolas in su Teatru Murgia de Sòrgunu, a is 19.30, cun sa presentada de su libru “Cent’anni fa arrivò Lawrence” (editzione Il Maestrale) de Giovanni Follesa, Rossana Copez, Sonia Borsato, Cristina Caboni, Giovanni Fancello, Antioco Floris,Gianluca Floris, Marcello Fois, Nicola Lecca, Davide Mariani, Luciano Marrocu, Maria Paola Masala, Francesca Mulas Fiori e Giorgio Pellegrini. Mòderat s’addòbiu Giovanni Follesa.
Chenàbura su 9 de argiolas, a is 19.30 in su Parcu Asusa de Ìsili, ddoe at a èssere sa presentada de su libru “Il bel viaggio” (ed. Arkadia) de Franco Mannoni. Mòderat s’addòbiu Maria Luisa Secchi,
Mèrcuris su 28 de argiolas, a is 19 in sa Antica Locanda Lunetta a Mandas, Umberto Oppus at a presentare s’ùrtima òpera sua “L’oste di Lawrence e la donna marrone” (ed. Sandhi). Mòderat s’addòbiu Giovanni Follesa.
Giòvia su 29 de argiolas, a is 19.30 in su padentinu Lawrence a Mandas, Umberto Oppus at a fàghere imbetzes de moderatore de sa presentada de su libru de Anthony Muroni “Mario Melis il presidente dei sardi” (ed. Arkadia).
Sàbadu su 31 de argiolas a is 19.30 semper in su padentinu Lawrence a Mandas at a èssere intregadu su Prèmiu D.H. Lawrence pro sa literadura a Pasquale Ruju, iscenegiadore de Tex, Dylan Dog, Nathan Never e Martin Mystère.
Su Fèstival at a sighire cun àteros apuntamentos de literadura e de cultura, cun intramesu ispetàculos de animatzione e is laboratòrios “100 anni con Lawrence” a Mandas, Serri, Ìsili, Nuradda, Làconi e Sòrgunu.
Non podiant mancare is biàgios cun su treninu istòricu de sa Sardigna.
Su 10 e s’11 de argiolas, partèntzia a is 8.50 dae s’istatzione de Mandas e torrada a is 16.30, est in programa su biàgiu in sa trata Mandas -Serri-Ìsili-Sarcidanu-Nuradda-Làcana.
Su trenu s’at a firmare in ogna istatzione pro si pasare e pro cunsentire s’acumprimentu de un’episòdiu de s’ispetàculu “Cent’anni di Lawrence” bogadu dae Mare e Sardegna de D.H. Lawrence e Back to Sardinia AA. VV. (ed. Condaghes). Leturas de Eleonora Giua e Daniel Dwerryhouse, mùsicas de Marco Argiolas.
Su 24 de argiolas, partèntzia a is 8.50 e torrada a is 18.30, pro su Biàgiu ispetziale in de su Treninu Birde Istòricu de sa Sardigna in sa trata Mandas — Seui in ocasione de is tzelebratziones de is chentu annos de Lawrence in Sardigna.
“Chentu annos a oe Lawrence at biagiadu in Sardigna- at naradu su diretore artìsticu de sa manifestatzione, Giovanni Follesa- Dd’at fatu cun ispìritu lìberu e cun su disìgiu de si lassare ispantare passu a passu. Issu e sa cumpàngia Frieda ant dimustradu de èssere modernos e curiosidadosos, a banda de is cunventziones. Duncas, su Fèstival de su tzentenàriu est istadu ammaniadu a inghìriu de su mannu romanzieri britànnicu. Ma sa riflessione subra su cuntzetu de biàgiu e autonomia de movimentu e pensamentu imponet peri de dare una mirada a su tempus presente. E tando est pretzisu no ismentigare chie ogni die est privadu de sa libertade sua, comente a Patrick Zaki, galu inserradu sena motivu perunu in unu càrtzere egitzianu”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
