In ocasione de sa chida natzionale de sa Protetzione tzivile in programma in totu Itàlia dae su 6 a su 13 de santugaine cun unu calendàriu ricu de eventos, sa Diretzione generale de Sardigna, pro sa prima bia, aberit sas ghennas suas a totu sas persones interessadas a su funtzionamentu de sa Sala operativa regionale integrada e de sa Sala operativa unificada permanente de su Tzentru funtzionale detzentradu e fintzas de sa Sala ràdio.
Pro custu b’at tempus finas a lunis su 7 de santugaine pro pòdere prenotare sa bìsita pròpia. Custa prenotatzione cheret fata compilende in lìnia unu formulàriu, disponìbile finas a b’àere logu, seberende su merie de su 10 o su de s’11 de custu mese.
Custa editzione est sa de ses. L’istitueint su 2019 faghende·la cumbinare cun sa Die internatzionale pro sa ridutzione de s’arriscu de sos disastros naturales chi est tzelebrada cada annu su 13 de santugaine.
Sa punna est sa de sensibilizare sos tzitadinos pro chi b’apat un’assentu atinadore in contu de contivìgiu de su territòriu. «Unu tzitadinu cussente – narant – est unu tzitadinu chi est a tretu de seberare, de adotare cumportamentos giustos pro s’amparu de s’ambiente minimende sos arriscos».
S’editzione de ocannu dèdicat atentzione manna a sos giòvanos pro mèdiu de su contu illustradu “L’attimo, la virgola” chi semper custu mese ant a donare in totu sas iscolas segundàrias de primu gradu de totu Itàlia dende mescamente atentzione a s’arriscu vulcànicu de sos Campos Flegreos. Su clàssicu disinnu dae artu chi non movet dae sos territòrios, e giai l’ischimus totu cantos (fintzas sos chi cun custa còntiga nos ant a individuare comente sa mègius sede pro sa rudda nucleare) chi in Sardigna arriscu vulcànicu non bi nd’at.
S’ispera est duncas chi nessi in su “open day” sardu faeddent de sos arriscos tìpicos de s’ìsula nostra.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
