S’Arcu de is Forros protagonista de s’addòbiu de su 27 cabudanni: bìsita ghiada a su santuàriu nuraghesu e cunferèntzia dedicada a is resurtados de sa campagna archeològica 2026
Iscobertas archeològicas noas e un’addòbiu abertu a su pùblicu pro connòschere dae presu su traballu de is archeòlogos. Custu domìnigu chi benit Biddamanna Strisàili tzèlebrat is Dies Europeas de su Patrimòniu cun una die dedicada a S’Arcu de is Forros, unu de is bidditzolos-santuàriu prus importantes de sa Sardigna nuraghesa
S’initziativa, in intro in su programa “Iscavos Abertos”, at a cumentzare a is 15.30 in s’àrea archeologica etotu, cun una bìsita ghiada fata dae is archeòlogos Enrico Dirminti e Matteo Tatti. Is partetzipantes ant a pòdere bisitare su santuàriu e connòschere is novidades essidas a campu dae sa campagna de iscavu noa.
A is 18, s’addòbiu s’at a iscostiare a s’àula consiliare de su Comunu de Biddamanna Strisàili pro una cunferèntzia dedicada a is chircas e a is resurtados de is iscavos. Ant a allegare, sa subrintendente Monica Stochino, is archeòlogos Enrico Dirminti e Matteo Tatti, Mario Paffi de Archeonova, Federico Scudu e Leonardo Deruda. Moderadora Alessandra Garau de Archeonova.
Sa campagna archeològica 2026 nde at bogadu a sa lughe un’istrutura tzirculare manna, de belle ses metros de diàmetru, cun unu foghile a mesu, individuada acanta a s’iscalera giai iscoberta in is iscavos de su 2016. A intro de sa muradura is ricercadores ant agatadu unu nitzu cun repertos metàllicos e tzeràmicos.
Tra is repertos cuberadodos ddoe est unu butone piticu de brunzu, abarradu cugugiadu suta terra pro unos tres mìgia annos. Un’àteru ogetu particolare essidu dae su nitzu est unu corru de prumu cun màniga de brunzu, paris cun àteros materiales.
Àteru agatamentu interessante sunt unas trinta brocas askòides atzapadas in un’àteru ambiente e collocadas cun coidadu. Is repertos oferint elementos noos pro cumprèndere ite si faghiat a s’internu de su cumplessu nuraghesu.
S’Arcu ‘e is Forros est unu cumplessu mannu meda, abitadu dae medas sèculos, cun domos pro ddoe bìvere, edifìtzios pro su cultu, tretos comunitàrios e frailes metallùrgicos. Su logu dd’ant abitadu a su mancu dae su Brunzu Mèdiu, mentras is istruturas monumentales printzipales andant dae su Brunzu reghente, a su Brunzu finale e a sa primu edade de su Ferru.
S’addòbiu de domìnigu at a èssere duncas un’ocasione pro connòschere siat su patrimòniu archeològicu giai nòdidu, siat is evidèntzias noas istupadas dae is iscavos de su 2026, contadas deretamente dae sa boghe de is istudiosos chi sunt traballende in su giassu.
S’initziativa est contivigiada dae sa Subrintendèntzia Archeologia, Bellas Artes e Paisàgiu pro is provìntzias de Tàtari e Nùgoro, paris cun su Comunu de Biddamanna Strisàili e Archeonova. Pro intrare non si pagat. Pro informatziones e prenotatziones est a mutire a su 378 3027077.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
