S’Unione europea tenet 24 limbas ufitziales: bùlgaru, croatu, danesu, èstone, finlandesu, frantzesu, grecu, inglesu, irlandesu, italianu, islovacu, islovenu, ispagnolu, isvedesu, lètone, lituanu, maltesu, olandesu, polacu, portughesu, rumenu, tedescu, tzecu e ungheresu. Ma a custa fotografia tocat de b’annànghere una didascalia dòpia.
Ca cheret contada sa chistione de s’allargamentu de s’Ue a Montenegru e Albania (e a sas limbas issoro). E ca non si podet fàghere a mancu de contare s’atzione de su guvernu de Madrid de reconnòschere su catalanu, su bascu e su galitzianu comente limbas ufitziales de s’Unione.
Bene, su 22 de cabudanni, is ministros de sos Afàrios èsteros de sos paisos europeos ant faeddadu de custa segunda chistione petzi pro sete minutos sena nde bogare atzola. Ma ite at sutzessu? S’Ispagna, cun su ministru suo José Manuel Albares at naradu chi emmo a s’allargamentu, narende però chi in antis de sas limbas noas in intro de su regime linguìsticu europeu (su montenegrinu e s’albanesu), tocat a nàrrere chi emmo a sas tres chi sunt isetende dae tempus.
Is ministros de Lituània (Sigitas Mitkus), de Germania (Gunther Krichbaum) e de Isvètzia (Jessica Rosencrantz) ant naradu chi nono: chie acusende Madrid de pònnere in ostàgiu Albania e Montenegru, chie faeddende de favores a cuncàmbia, chie de chèrrere partzire sas allegas (che chi s’intrada de paisos noos no allarghet fintzas su ventàlliu linguìsticu de sa Ue). Comente devimus bìdere custa chistione?
A un’ala s’Europa est pronta a crèschere cun paisos noos e limbas noas, ma lu faghet mescamente pro chistiones geopolìticas (nemos cuat sa punna de bogare zonas intreas a s’influèntzia russa) e lassende a unu cras su destinu de tres limbas natzionales (chi sa monarchia borbònica – mancu sa repùblica italiana – reconnoschet comente co-ufitziales in sas comunidades autònomas suas).
A s’àtera b’amus su livellu prus avantzadu de su guvernu Sánchez chi cheret su reconnoschimentu de custas tres limbas fintzas a livellu europeu.
Mancari su nono de Bruxelles (ca de custu semus faeddende), custa est una letzione chi cheret istudiada inoghe. Pro cumprèndere sos lìmites de s’Unione europea, pro cumprèndere sos lìmites de sa manca italiana, pro cumprèndere sos lìmites de nois sardos chi no amus un’idea de comente lòmpere a sa co-ufitzialidade de su sardu cun s’italianu.
Petzi a pustis bi diat pòdere àere unu guvernu chi pedit a s’Europa de pònnere su sardu comente limba ufitziale sua.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
