Sighit su caminu de s’Einstein Telescope in Lùvula. A pustis de sa cuntzessione firmada in Casteddu su 15 de nadale de s’annu coladu (cando aiant firmadu pro intregare a sos istitutos Infn, Inaf e Ingv unu situ de 13mìgia metros cuadros) e de sa prima pedra posta su 17 de trìulas de annoas, su 23 de cabudanni ant firmadu su documentu de cunsigna de sos traballos pro su fràigu de ET-SumLab.
Einstein Telescope Sardinia Underground Laboratory: custu est su nùmene pro intreu de su tzentru de chirca de Sos Enattos, logu candidadu a ospitare s’osservatòriu europeu de sas undas gravitatzionales. Chirca, didàtica e divulgatzione iscientìfica, duncas. Fainas chi ant a fàghere in s’àrea chi a como est ocupada de s’istrutura minerària de s’ex Rimisa, ue sos annos colados bi faghiant sas atividades de su laboratòriu Sar-Grav.
Previstu finas unu laboratòriu suterràneu multidisciplinare. SUnLab, chi b’ant a collaborare fintzas sas universidades de Casteddu e de Tàtari, at a ospitare atividades de chirca e de isvilupu pro s’Et e esperimentos de fìsica a rumore bassu (comente s’esperimentu Archimedes ativu in Sos Enatos dae su 2019) in prus de un’osservatòriu geofìsicu pro s’istùdiu de sas istruturas internas de sa Terra e de su telescòpiu terrestre “MezzoCielo” cun abertura manna.
S’istrutura at a èssere fintzas unu tzentru de riferimentu pro progetos de divulgatzione indiritzados a sas iscolas e de formatzione professionale. Su disegnu architetònicu e paesagìsticu l’at elaboradu unu grupu de traballu de s’AT Lab de su dipartimentu de Ingegneria tzivile, ambientale e architetura (Dicaar) de s’Universidade de Casteddu, coordinadu dae Massimo Faiferri. ET-SUnLab est finantziadu cun belle 10 milliones de èuros dae sa Regione Sardigna e ateretantos partzidos intre sos istitutos natzionales de fìsica nucleare, de astrofìsica e de geofìsica e vulcanologia.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
