“In su 2019 su campus nou pro is universitarios” Oe sa firma ùrtima pro cumentzare sos traballos in su logu de s'Ex Sem in s'arburada de Playa

CASTEDDU.  In su mese de cabudanni ànt a cumentzare sos traballos pro realitzare su campus universitàriu de Casteddu in cambiu de s’ex Sem de s’arburada de Playa. Oe b’at istada sa firma de su cuntratu cun s’impresa: sos traballos diant dèpere durare un’annu e mesu.

S’ok a s’istrutura chi at a pòdere acollire 240 istudiantes, sa prima banda de sos traballos, est istadu donadu custu mangianu dae su presidente de sa Regione Francesco Pigliaru, sos assessores de su Bilantzu e de sa Cultura Raffaele Paci e Giuseppe Dessena, sa retora de s’Universitá de Casteddu Maria Del Zompo e su sìndigu de Casteddu, Massimo Zedda.

Sos nùmeros. Totu s’investimentu est de 35 milliones.451 mìgia 915 èuros. Su segundu lotu previdet de faghere àteros 300 postos letu, servìtzios de ristorazione e impiantos isportivos, pro unu balore de belle 25 milliones de èuros.

Comente at a èssere su campus

S’istòria. S’iter pro faghere unu campus in Casteddu est cumentzadu in su 2000 cun s’aprovatzione dae su Cussìgiu Comunale de su programma integradu propostu dae sa sotzietade “Edilia Fàbricos spa”. S’est posca arribbados a su 2008 cun s’achisitzione, dae banda de s’Ersu, de s’àrea ex Sem de arburada Sa Playa e a s’emanatzione de sas diretivas de sa Giunta regionale pro su fàbricu de su studentato. In su 2012 presidente de sa Regione, sìndigu, retore e presidente de s’Ersu ant sutascritu un’acòrdiu de programma pro sa realizatzione de s’istrutura e pro otènnere su dinari. In su 2013 s’Ersu at acumpridu sa gara binta dae sa Pellegrini-Vipp spa. Su progetu definitivu at afrontadu s’iter de achisitzione de sos pàrreres de sos entes interessados chi s’est concruidu cun sa istìpula de una cunventzione tra su Comunu de Casteddu e s’Ersu in su maju 2017.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.