“S’antifascismu est màfia”. Si Giovanni Falcone e Paolo Borsellino, duos magistrados eroes de s’antimàfia, legherent custos faeddos forsis si nde diant pesare dae sa tumba. Una làstima chi no siat possìbile a beru.
Sa frase l’ant posta in unu manifestu aprontadu dae una truma de giòvanos de f unu grupu organizadu de sa destra estrema italiana (organitzazione chi faghet parte de Casa Pound) durante una manifestatzione fata in dae in antis de un’iscola, su Litzeu Siotto, su 23 de maju in Casteddu.
Custu su fatu. S’episòdiu no est ùnicu. In is meses colados in Itàlia etotu Blocco Studentesco at organizadu àteras manifestatziones cun su matessi “slogan”. Is istudiantes durante sa manifestatzione ant cuntestadu “su sistema mafiosu chi dae tempus est intradu e cumandat in is iscolas e istitutziones italianas”. Ant naradu finas chi “is paràulas sunt comente càbbias” e “a chie crìticat s’immigratzione li narant ratzista” opuru “chie valoritzat sa famìlia est omòfobo”, “chie faeddat de identidade natzionale benet cunsideradu fascista”.
In Casteddu dae annos no arregordamus una protesta istudentesca gosi, chi bàrigat sa làcana de is valores democràticos mancari, bisòngiat a ddu nàrrere, in is annos sa tzitade, a dolu mannu, at bidu esponentes polìticos de sa dereta istituzionale e democràtica chi no ant festadu su 25 de Abrile. Sa dereta chi como guvernat a livellu natzionale prus bortas, comente s’ispina a suta de su ludu, at chircadu de fèrrere is valores antifascistas rapresentados in sa Costituzione.
Mai però at postu sa paràula “antifascismu” in paris cun “màfia”. Ddu lassat fàghere a àtere. Nemus di fatis dae s’ala polìtica de sa dereta at cundennadu sa manifestatzione de Blocco Studentesco mancari sa luta a sa màfia diat dèpere èssere punna de totus (comente s’antifascismu). Dae s’iscola ant bogadu boghe is professores cun una nota de su Collègiu de is dotzentes mentras sa deputada progressista Francesca Ghirra at presentadu un’interrogatzione a su ministru de s’Internu Piantedosi:
“Connosco bene meda s’identidade antifascista e democràtica de su Litzeu Siotto – iscriet – chi fintzas deo apo frecuentadu, ma m’apessamentat cantu est acadessende in su Paisu nostru ue torrant a si pesare movimentos de ispiratzione fascista. Apo presentadu un’interrogatzione a su ministru Piantedosi pro ischire si connoscat cantu est acontèssidu fintzas in Casteddu, si sa manifestatzione esseret autorizada dae sa Cuestura e comente bolet intervènnere pro evitare identificatziones arbitràrias de pessones chi manifestant ideales antifascistas” e, a su contràriu, controire su de si difùndere de episòdios de propaganda fascista”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
