Torra in pratza pro sa Palestina lìbera. Un’àteru isciòperu generale at batidu in Itàlia e in Sardigna etotu medas mìgias de persones chi pedint sa fine de sa gherra in Gaza.
Sa protesta noa arribbat a pustis de s’arrestu de sos ativistas de sa Global Sumud Flotilla, sa speditzione chi atraessende su Mediterràneu at chircadu de giùghere in su portu de Gaza cun agiudos umanitàrios. Eris s’esèrtzitu de Israele at firmadu sas barcas in su mare internatzionale ue però no tenìat perunu diritu de ddu fàghere.
Comente respusta dae sa note de giòbia mìgias de tzitadinos ant prènnidu sas pratzas de medas tzitades italianas e in su matessi tempus dae in antis a sos ispidales giai nche fiant presìdios pro regordare sos 1.667 mèigos e traballadores de sa sanidade ochidos dae sas bombas de Israele.
In prus oe sos sindacatos ant proclamadu su segundu isciòperu generale in pagas chidas, su primu fiat su 22 de cabudanni. Su seberu no est pràghidu a sa premiere Giorgia Meloni, chi at naradu “fine chida longu e rivolutzione no andat in paris”, e nemmancu a su ministru de sos Trasportos Matteo Salvini chi at fatu ischire: “chie leat parte a s’isciòperu pagat sas cunsighientzias”.
Sa respusta. Oe in Sardigna nche sunt manifestatziones in Casteddu, Tàtari, Nùgoro, Iglèsias, Terranoa. In Casteddu ant leadu parte a sa manifestatzione 15mìgias persones unu nùmeru in lìnia cun s’ùrtima manifestatzione. Nche sunt istudiantes, famìlias, traballadores, polìticos (presente sa presidente Alessandra Todde) pro unu corteu chi andat ultres sas banderas de sos sindacatos. Est unu datu chi sutalìniat comente sa gherra in Gaza e sa positzione contro su Guvernu italianu pro canto pertocat Israele e Palestina at torradu a ischidare sa gente: dae annos in Sardigna no arregordant manifestatziones comente custas.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
