Dae sa Sardigna a s’India pro su tzinema de inchesta

Massimiliano Mazzotta in paris cun Marilù Mastrogiovanni

Massimiliano Mazzotta, fundadore e diretore artìsticu de su fèstival Life After Oil chi si tenit in Sardigna dae su 2014, at a èssere in su forum internatzionale “Difficult Dialogues” in Goa (Ìndia), dae su 14 a su 16 de freàrgiu.

A su tzentru de s’interventu suo, su fèstival dedicadu a sos temas de sa sostenibilidade de s’ambienta e sos diritos umanos. Documentarista originàriu de sa Puglia, in Sardigna at giradu in su 2009 su film “Oil” in sa Saras de Sarrocu. Un’ocasione pro faeddare de su cuncursu Life After Oil chi a pustis de Maltis e Istintinu, dae su 2017 est lòmpiu a Lungone, faghende tapa in s’ùrtima editzione fintzas in Casteddu e Otzana.

Un’editzione chi at tentu tra sos ospites Marilù Mastrogiovanni, giornalista salentina famada pro sas inchiestas suas po canto pertocat sa Sacra Corona Unida, chi at a acumpangiare Mazzotta in su biàgiu in Ìndia. S’invitu arribbat diretamente dae Surina Narula, fundadora de Difficult Dialogues.

A su tzentru de su forum chistiones apretosas e de atualidades in s’Àsia meridionale. Su tema de custa editzione est s’Istadu de diritu, e sa presèntzia de Mazzotta e Mastrogiovanni andat incuadrada fintzas tenende contu de sas esperièntzias issoro: ambos pro sas balentiosas inchiestas issoro ant subidu minetzas e càusas giuditziàrias.

A sa cunferèntzia ant a leare parte espertos, giornalistas e attivistas dae diversas alas de su mundu. No est s’ùnicu remenu in Ìndia de Mazzotta. Gràtzias a su pretziosu traballu de Marianne Burgu, atoressa frantzesa chi bivet in Àsia e de carchi annu collàborat cun Life After Oil, at a batire su fèstival creschidu meda fintzas gràtzias a sa collaboratzione cun sa Fundatzione Sardigna Film Commission in diversas iscolas de Hyderabad, Dhaward e Goa cun un’issèberu de filmados giai propostos in s’ìsula. Annotamala Mazzotta at a tènnere unu workshop a su fèstival de Pune.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.