Diego Armando Maradona, El Pibe de Oro, s’est mortu custu merie a càusa de un’arrestu cardìacu. Sa noa mala est istada donada dae su giornale argentinu Clarin.
Su nùmeru 10 prus mannu de s’istòria de su fùbalu, ex giogadore de sa natzionale argentina, de su Bartzellona e de su Nàpoli dae pagu fiat istadu operadu a su cherbeddu e s’interventu fiant andadu bene. Ma oe, su 25 de onniasantu, totu in una, una punta subitana dd’at mortu in domo sua, acanta fiat colende sa convalescèntzia.
Su campione argentinu, chi prus pagu de unu mese a oe aiat lòmpidu 60 annos, at bìnchidu su Mundiale de su 1986 cun s’Argentina, e cun su Nàpoli duos iscudetos (1987 e 1990). Ma pro contare chie fiat Maradona, una vida de etzessos e de travessuras foras dae su campu, non bastant is tìtulos e is trofeos, issu fiat medas àteras cosas: unu campione, unu mitu, La Mano de Dios, un’isperàntzia pro medas.
