No, ocannu non ddoe at a èssere gente meda in sa ruga e mancu caddos cuncordados cun frores o bestimentas traditzionales de ònnia bidda de sa Sardigna. Pro more de su coronavirus fintzas sa Festa de Sant’Efis est a arriscu.
Est cosa nòdida chi sa tzelebratzione de su 1° maju no est comente is àteras festas de s’ìsula: dae bator sèculos faghet parte de sa tzitade de Casteddu dae cando, narat s’istòria, Sant’Efis aiat liberadu sa Sardigna dae pesta, in su 1656. Unu meràculu.
Fonte: situ ufitziale Comuna de Casteddu
Est fàtzile cumprendere tando pro ite su presidente de sa Regione Christian Solinas e su sìndigu de Casteddu Paolo Truzzu si sunt unidos in s’invocatzione a su santu: pedire unu miràculu nou pro liberare sa Sardigna dae sa pesta noa de su Covid-19.
E tandu? Si podet agatare unu rimèdiu pro sarvare sa festa e isòrvere su votu ocannu puru? Tzertu: si sa gente non podet andare dae su santu, tando chi siat issu a andare dae is fideles. Calicunu at propostu de fàghere passare su bultu de su màrtire in totu sa tzitade in pitzu de un’autocarru, comente cussu chi aiat batidu su santu in su 1943, cando sa tzitade de Casteddu fiat istada fata a murighina dae is bombas de is Alleados, in sa Segunda gherra mundiale.
Su màrtire gloriosu chi colat in is rugas de sa tzitade, dae unu bighinadu a s’àteru? S’idea est pràghida meda a sa gente, ma immoe s’at a bìere chi is istitutziones e sa crèsia ant a donare coddu a custa proposta.
S’amministratzione de sa Comuna est cumpudende custa e àteras possibilidades, at naradu s’assessore Alessandro Sòrgia, chi at afirmadu ca is proponimentos ant a èssere valutados in sa metade de su mese de abrile, paris cun is òrganos e is autoridades cumpetentes: su sìndigu, su cuestore, su prefetu e su cumandante de sa Politzia munitzipale. Ma in is mèdias sotziales est custa idea sa chi est agradèssida de prus. L.M.
