In Tiesi, is de sa Pro Loco, ant organizadu una mustra de is bestireddos de is criaduras dae su 1886 a su 1960 in “Sa domo de Don Zusepinu”, dimora nobiliare antiga de is Garaos, chi at a abèrrere a su pùblicu custa chida dae is 17 a is 18.30 e sàbadu su 13 de ghennàrgiu in ocasione de “Rochitas in festa” dae is 11 a is 18.
Custa borta, protagonista de sa manifestatzione culturale e enogastronòmica promòvida dae s’amministratzione comunale, ant a èssere is bestireddos de is criaduras de su tempus coladu. “Fascas, cossitos e caretas”, custu est su tìtulu de s’espositzione in contu de pìngios infantiles dae su 1886 a su 1960.
Belle bìndighi lustros chi ant a èssere contados in òrdine cronològicu pro mèdiu de camissolas, fascas, coberteddas, pannos, caretas, cossitos, mantellas de batijare e àteros pìngios de grandu valore culturale e istòricu in unu cuntestu de mobìlias e trastes antigos.
“Sa mustra – declarant is de sa Pro Loco tiesina – bolet pònnere in evidèntzia s’abilidade, sa passèntzia e is capassidades de is ricamadoras de professione o de cuddas fèminas chi a sa sola sestaiant e cosìant is bestireddos de fitu e de die nòdida”.
Sa mustra est aberta a su pùblicu giai dae su 17 de nadale a parte de merie (custa chida dae is 17:00 a is 18:30), cun medas bisitadores acudidos pro ammirare custas bestes pro pipios dae s’agabbu de s’800 e a is primos 60 annos de su sèculu coladu. Sa resessida manna de s’eventu at indoidu is organizadores a programmare una sessione noa de bìsitas ghiadas in intro de “Rochitas”, dae is 11 de mangianu, cun espertos de su setore prontos a acumpangiare is chi ant a chèrrere apretziare s’arte de unu tempus.
De prus, semper sàbadu 13, unas cantas fèminas ant a abèrrere is ghennas de is coghinas de domo issoro pro ammustrare comente s’abrontat sa pasta de is dies de festa, connota comente “sos macarrones a ferritu”.
Custa faina bòlida dae sa Pro Loco de Tiesi, punnat a su recùperu de su patrimòniu culturale, linguìsticu, naturale, paisagìsticu e monumentale locale pro mèdiu de publicatziones e fainas. Totus custas initziativas sunt regortas in su giassu sabertula.it, una bussa multimediale cuncordada pro ammustrare e pònnere a disponimentu de chie si siat un’archìviu de imàgines, testos, vìdeos e chircas.
Sa mustra “Fascas, cossitos e caretas” est sa de bator espositziones organizadas dae s’assòtziu turìsticu locale (fundadu cun su grupu atuale in su 2002) in sa “Sa domo de Don Zusepinu”. Duncas, s’addòbiu annoadu est pro custa chida dae is 17:00 a is 18:30 e pro sàbadu su 13 de ghennàrgiu, cun intrada dae carrera de Sulis, dae is 11:00 a is 18:00.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
