Ocannu, comente est nòdidu, si tzèlebrat su tzentenàriu de su cunferimentu de su Prèmiu Nobel pro sa Literadura a Grazia Deledda, assignadu in Istocolma su 10 de nadale 1926. Sunt giai medas is initziativas in programa in Sardigna e in su mundu pro ammentare custu anniversàriu importante: eventos culturales, mustras, fèstival literàrios e progetos artìsticos pro torrare a iscobèrrere e a avalorare s’òpera sua, mescamente pro dda fàghere connòschere a is levas noas. Pro mèdiu de leturas, fainas artìsticas e de libros a indonu in is iscolas, si bolet fàghere connòschere galu de prus sa grandu iscritora sarda e su s’acàpiu ùnicu e fungudu chi issa aiat cun sa terra e sa cultura de s’Ìsula.
Nointames su Nobel retzidu in su 1926, Deledda est a s’ispissu ausente in is antologias e in is programas iscolàsticos ufitziales, creende unu “bòidu culturale” mannu in su connoschimentu de sa literadura italiana de su Noighentos (Mazza, 2017). S’òpera de Deledda, cun s’anàlisi sua de is drammas psicològicos e de is dinàmicas sotziales de sa Sardigna, rapresentat unu patrimòniu literàriu de fundamentu e un’ocasione pro avalorare sa prospetiva feminile in sa literadura italiana.
Grazia Deledda, pesada in Nùgoro, sa limba mamma sua fiat su sardu, fiat andada a iscola pagos annos ebbia e posca aiat megioradu sa connoschèntzia de s’italianu a traessu de leturas e temas iscritos cun s’agiudu de una maistra privada. Custu percursu autodidàticu creat unu parallelu interessante cun Canne al vento, comente trastu didàticu: gasi comente Deledda at imparadu sa limba cun sa pràtica e sa letura, como is istudiantes podent imparare s’italianu gràtzias a su romanzu suo.
Difatis, in ocasione de su tzentenàriu de s’intrega de su prèmiu Nobel a Grazia Deledda, in s’agabbu de mese de idas 2025, pro sa domo imprentadora NOR, est essidu Canne al vento: testo didattico per l´apprendimento della lingua italiana. S’òpera si proponet comente trastu didàticu pro istudiantes de italianu L2 e podet èssere impreadu fintzas dae is istudiantes italianos de is classes mèdias. S’editzione dd’nt contivigiada Tania Sanna, Laura Medda e Cinzia Marongiu, acadèmicas impinnadas dae annos in is setores de sa didàtica de s’italianu comente segunda limba e de sa literadura italiana. S’introduida a su libru, firmada dae s’istudiosa Cristina Lavinio, oferit unu fundamentu crìticu autorèvole, chi acumpàngiat su leghidore a sa connoschèntzia de s’òpera.
Su romanzu est presentadu in una versione istudiada pro agiuare s’aprendimentu, ma poderat intatu su testu originale de Deledda, mantenende·nde sa fortza espressiva e sa richesa istilìstica. Is istudiantes, de custa manera, s’ant a pòdere cunfrontare cun s’italianu de su primu Noighentos, cun is arcaismos suos e is allegas regionales, sena pèrdere sa profundidade e s’intensidade de sa narratzione.
Cada capìtulu est acumpangiadu dae atividades chi favorèssent sa cumprensione, su lèssicu e sa produtzione orale e iscrita. Unos cantos esertzìtzios, comente visualizare su paisàgiu o prevìdere s’isvilupu de sa trama, faghent a manera chi s’istudiante leghidore siat sempre ativu e interessadu.
Custu volùmene didàticu naschet dae su dovere de preservare e tramandare su valore de s’òpera de Deledda a is giòvanos. Su libru donat a is istudiantes s’oportunidade de s’acurtziare a s’italianu non cun règulas teòricas e normas astratas, ma comente esperièntzia bia, imbèrghida in sa cultura, sighende s’esèmpiu de s’iscritora.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
