Dae su 14 a su 18 de maju sa Sardigna at a partetzipare a sa de 38 editziones de su Salone Internatzionale de su Libru de Torinu, unu de is addòbios prus importantes a livellu natzionale e internatzionale pro su mundu de s’editoria. Sa presèntzia de s’ìsula naschet dae sa collaboratzione intre sa Regione Sardigna e s’Assòtziu Editores Sardi (AES), impinnadu in sa promotzione e valorizatzione de sa cultura e de sa produtzione editoriale sarda.
S’editzione 2026 giughet unu significadu importante meda pro sa Sardigna, pro more de unos cantos anniversàrios de contu e risconnoschimentos de grandu valore culturale e simbòlicu. Unu est difatis su tzentenàriu de su Prèmiu Nobel pro sa Literadura assignadu a Grazia Deledda, un’àteru est su reconnoschimentu de is Domus de Janas comente patrimòniu UNESCO e, in fines, is barant’annos atividades de s’Assòtziu Editori Sardi, chi rapresentat bona parte de sa produtzione libraja regionale.
Sa Sardigna s’at a presentare a Torinu cun unu programa mannu e articuladu: prus de 48 addòbios, 33 domos editoras, addòbios culturales, presentadas, momentos musicales e projetziones tzinematogràficas. Unu percursu pensadu pro contare sa balia culturale de s’ìsula a traessu de libros, archeologia, istòria, memòria, chirca e innovatzione.
S’argumentu seberadu pro su “Spazio Sardegna” at a èssere “La volta dipinta di stelle”, unu tema cun unu valore evocativu mannu chi remonat su raportu intre imaginatzione, literadura e patrimòniu culturale. S’imàgine sìmbulu de s’editzione, realizada dae Paola Serra, rapresentat unos cantos giòvanos protagonistas chi osservant su chelu dae una domus de janas, in unu diàlogu ideale intre passadu e benidore, memòria e levas noas.
A su tzentru de sa programatzione ddoe at ant a èssere is Domus de Janas, protagonistas de s’iscenàriu nou abertu cun su reconnoschimentu UNESCO, e sa figura de Grazia Deledda, mentovada pro more de su prèmiu Nobel e fintzas pro sa modernidade e s’atualidade de sa produtzione literària sua.
Paris a custos temas ant a agatare tretu aprofundimentos dedicados a sa narrativa sarda, a sa sagìstica, a is logos e a is personàgios de s’ìsula e laboratòrios pro is prus giòvanos. Su programa at a dialogare in prus cun su tema generale seberadu dae su Salone 2026, “Il mondo salvato dai ragazzini”.
Sa presèntzia sarda at a èssere arrichida fintzas de su progetu “Sardegna Frame by Frame”, insertadu in su tzicuitu de su Salone OFF, cun projetziones tzinematogràficas organizadas a manu tenta cun sa Sotziedade Umanitària de S’Alighera e sa FASI.
“Andamus a Torinu cun grandu orgòlliu – at declaradu s’assessora regionale a sa Cultura Ilaria Portas – pro su reconnoschimentu de is Domus de Janas comente su de 61 sitos UNESCO de s’Itàlia. A su Salone non giughimus libros ebbia, ma s’essèntzia etotu de s’istòria millenària nostra e de sa Sardigna comente baricentru culturale de su Mediterràneu”.
Satisfata fintzas sa presidenta de s’AES Simonetta Castia, chi at sutaliniadu su valore de su traballu cumpartzidu portadu a dae in antis in baranta annos de faina e su ruolu istratègicu de sa partetzipatzione a su Salone de su Libru pro promòvere autores, editores e impresas culturales sardas in unu cuntestu internatzionale.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
