Ismentighemus·nos pro un’iscuta giudìtzios e pregiudìtzios ispàrghidos dae parte manna de sos chi narant de ischire faeddare su sardu. Ismentighemus·nos duncas fintzas sas dudas de sos chi timent a si nche ghetare in cussu mare mannu de sa limba, che chi sa comunicatzione in sardu esseret una cumpetitzione olimpiònica e non su tzimentu de una comunidade. Pro nche barigare custu barrancu, in Thiniscole sunt ammaniende una pratza galana, sa Pratha ‘e Marcatu, mudende·la pro chimbe seros in “Sa Pratha ‘e sa Limba” e ponende paris locutores espertos cun chie tenet petzi cumpetèntzias passivas.
Chie l’est ammaniende? S’Ufìtziu de sa limba sarda de s’Unione de sos Comunes de su Monte Arvu, sa Pro Loco de Tiniscole e Istellas Events, un’assòtziu de giòvanos chi at regortu deretu sa proposta cun fiamore mannu. Cando est chi Pratha ‘e Marcatu diventat “Sa Pratha ‘e sa Limba”? Onni sero, dae sas 9 (cando bi diat dèvere àere agigu de friscura), dae su 31 de austu a su 4 de cabudanni. E ite b’at a àere in custa pratza? Peruna letzione (pro cussas s’Ufìtziu est aprontende unu cursu nou), perunu interrogu. E, duncas, perunu giudìtziu. In custas arresonadas serentinas, cun temas chi ant a comunicare luego, «sos partetzipantes ant a àere s’oportunidade de si pònnere in giogu in intro de un’ambiente ospitale», narant sos organizadores.
Sa “Pratha” si presentat duncas comente «un’amparu pro chie cheret colare dae sa cumprensione passiva a sa produtzione ativa cun maneras naturales e gratificantes». «Sa continuidade de sas chimbe seradas – sighint sos de s’Uls, de sa Pro Loco e de Istellas – at a permìtere a sos frecuentadores de intrare in ballassa a bellu a bellu familiarizende cun sa pronùntzia e cun su fràigu de sas frases in un’ambiente serenu e festosu». Est pro custu chi invitant «a sa comunidade intrea pro chi pighet parte a custu eventu de valorizatzione ativa de su patrimòniu linguìsticu locale, non comente unu repertu de su tempus coladu ma comente un’istrumentu biu, inclusivu, projetadu conca a su tempus benidore de sas generatziones noas».
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
