Is indipendentistas de Repùblica ant sinnalau a sa Magistratura is isbarcus abusivus de is mega-yacht, is festas in is risèrvas naturalis e su “sachègiu” de su demàniu marìtimu dae Palau, a su Parcu de Sa Madalena, finas a s’ìsula de Mortorio.
“Biendi s’aumentu de episòdius de criminalidadi, cafoneria, arrogàntzia, abusivismu e usurpamentu de su patrimòniu naturali de sa natzioni sarda” iscrient in una nota de imprenta “chi est caraterizendi s’istadi de su 2026”, su movimentu indipendentista Repùblica at depositau un’espostu formali a sa Procura pedendi un’interventu lestru de sa Magistratura.
S’initziativa legali nascit a pustis de una sèrie longa de episòdius, definìus grais meda, de crònaca documentaus e chi amustrant sa trasformatzioni de su demàniu marìtimu e de is risèrvas naturalis sardas in unu parcu de giogu po turistas chentze arrespetu po is logus chi ddos acollint.
In s’atu cunsignau a s’Autoridadi Giuditziària, Repùblica at sutaliniau episòdius specìficus, acapiendi documentatzioni fotogràfica e vìdeos, po pediri chi sa procura si pòngiat a circai reatus. Custus is episòdius:
Palau: S’isbarcu de echipàgius de mega-yacht cun barchetas (tender) po cuncordai pràngius esclusivus cun mesas e gazebo in sa plaja de totus.
Ìsula de Mortorio: Sa trasformatzioni de su mari, ainnanti de un’ìsula a tutela integrali de su Parcu Natzionali de Sa Madalena, in una discoteca cun festas de mùsica e àncoras caladas chi parrint chentze permissu.
Cala Luna (Gulfu de Orosèi): S’ocupatzioni de sa marina e de is grutas naturalis cun struturas fìssas e letinus.
Cala Coticcio (Caprera): S’assaltu chentze de controllu de barcas a motore e gommonis a intro de is lìmites de amparu de sa riva chi parit una violatzioni crara de is contingentamentus de su Parcu.
Marinas de sa Sardigna: S’abitudini illegali de ocupai prima is ispiàgias lìberas cun parassolis e letinus comenti “sinnaladoris de postu” lassaus a de note.
Su grupu indipendentista narat chi sa Sardigna non podit essi “tratada comenti una terra chentze lei, aundi turistas arricus, mega-yacht e incivilis pensant de podi pistai is leis, s’ambiente e su deretu de is sardus de amparai su patrimòniu ambientali insoru e de gosai lìberamenti de su mari insoru sceti ca ddu podent fai”.
Narant chi custu no est turismu, est colonialismu predatòriu: “Presentai custu espostu est un’atu de difesa de sa dignidadi nostra e de su patrimòniu ambientali nostru. Est un’atu dèpiu cara a chini bivit su territòriu totu s’annu e chi, po mori de custu mudellu de impreu, a cussus matessi logus tenit semper prus pagu accessu”.
“Custas chistionis – concluint – diant depi fai arresonai a pitzu de su modellu turìsticu chi sa Sardigna bolit adotai. Diant depi portai is sardus a si fai una dimanda: boleus chi sa terra nostra siat connota in su mundu comenti a unu paradisu de extralussu aundi chini est arricu si podit permìtiri de no arrespetai is leis e de usurpai s’ambiente? Su patrimòniu comunu no si podit furriai in unu privilègiu po pagus”.
