B’at àpidu unu tempus chi s’annu non comintzaiat in ghennàrgiu, ma cando sa terra torraiat a cramare. Su mese de cabudanni fiat su liminàrgiu de unu tempus nou ue, a pustis de sa sicagna istiale, si torraiat a ammaniare sos campos isetende sas abbas. Organizadu dae s’assòtziu culturale S’Orcu ‘e Montiarvu e dae su grupu folk La Caletta, s’eventu thiniscolesu de su 12 de su mese chi intrat nche torrat a su coro de sa bidda custa memòria funduda ligada a sa terra, a sos paschìngios e a su Monte. A su chi narant sos organizadores, cun s’eventu non si cheret acumprire a una rapresentatzione de su chi fìamus, ma reconnòschere su chi semus pro mèdiu de espressiones, de paràulas e de sièntzia custoida dae sa gente nostra.
Sa die comintzat a sas 11 cun s’abertura de sas mustras comente “Storia e simboli del rito agrario” in su museu de su Carrasecare thiniscolesu, s’espositzione de su bestire traditzionale de sas fèminas thiniscolesas in sa Crèsia de Sant’Antoni e sa mustra fotogràfica “Surcos – Storie incise sulla terra” (cun immàgines de sa Thiniscole rurale) in carrera de Nurra. Su programma sighit cun su laboratòriu de catzigadura de s’àghina “A cathicatura” a sas 11,30 e cun “Licanzias”, percursu de tastu cun sas cantinas e sas prendas agroalimentares de su territòriu dae mesudie a sas ses de sero in sa Corte Sinnis/Mele. In sos matessi tretos, ma a sa una e a sas oto b’est imbetzes s’apuntamentu cun “Terra Nostra – Siniscola a tavola nelle sue radici e nei suoi sapori” contivigiadu dae su Ristorante Dea Mama.
A merie, a sas 16.30, tocat a sos pitzinnos de s’asilu de Sant’Antoni, cun sos contos issoro de “Raicrinas de vida” faeddende de sa natura e de sos colores suos. A sas 18 s’apuntamentu est cun su cunvegnu “Chìndalos – la ricerca che alimenta la tradizione” in contu de grupos folk e de su ruolu issoro in sa trasmissione de su patrimòniu culturale. Sos ballos comunitàrios acumpangiados dae su sonete de Andrea Marongiu a sas 19.30 antìtzipant su cuntzertu de sos Tazenda in pratza de Sant’Antoni. In urtimera sos fogos pirotècnicos saludant un’eventu prenu de significadu e de identidade. E s’annu nou.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
