S’istadu italianu podet nàrrere chi est resèssidu pro pagas oras a no lu fàghere mòrrere in galera (petzi si non cherimus nàrrere chi s’est rèndidu semper in intro, in su repartu detentivu de s’ospidale San Paolo de Milanu).
S’òmine chi est prus chi non fàtzile a nos l’ammentare comente su latitante, su bandidu, su mortore (venghende su frade), s’evasore, s’intermediàriu (chi ant impreadu pro illiberare a Farouk), su cundennadu, su gratziadu, su torradu a intro, fiat un’òmine chi no istaiat bene.
Aiat lòmpidu 83 annos su 4 de abrile e nche fiat torra in presone dae su mese de nadale de su 2021, cando n’aiat 79, pro si nde fàghere àteros 30. Assòtziu a delìncuere finalizadu a su tràficu de droga: custa fiat s’acusa chi a comintzu fiat de 24 annos.
In teoria nche deviat torrare a intro giai dae s’istiu de su 2020, ma in antis de nche lu tènnere in Dèsulu aiat coladu un’annu e mesu in bestes de latitante a betzesa. «Sos bestires e totu su chi tèngio dage·lu a sos pòberos», aiat naradu isvanessende in su nudda.
Arrestadu, nche lu giugheint a Badu ‘e Carros. Ma non b’at àpidu peruna aplicatzione de su printzìpiu de sa territorialidade de sa pena. Difatis dae duos annos nche l’aiant inserradu in sa presone milanesa de Òpera. A tesu dae sos logos suos e dae sa gente sua.
Petzi sa die in antis de si rèndere aiant acòllidu s’istàntzia de diferimentu pena pro motivos de salude presentada a su tribunale de sorvelliàntzia de Milanu dae sas avocadas suas Beatrice Goddi e Maria Luisa Vernier.
«Finas a ùrtimu a Graziano Mesina nche l’ant lassadu in presone. Contra a issu b’at àpidu un’ispètzia de acanimentu – at naradu a s’Ansa sa legale Goddi –. Semus dispràghidas mannas e finas contrariadas ca nde lu podiant bogare in antis, nessi unu mese a como. Oe nos fìamus preparende pro l’agatare in pare cun carchi familiare suo e pro l’organizare su trasferimentu in Sardigna».
Imbetzes Mesina s’est rèndidu in Milanu una die a pustis dae su trasferimentu dae galera a su ricòveru detentivu. Fiat totu su chi amus naradu a comintzu, ma fiat unu malàidu terminale.
Chi como est in sa buca de su giustitzialismu social. Cun probabilidade manna semus perdende un’ocasione pro faeddare de unu problema giuditziàriu mannu chi tenimus. O pro nos callare.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
