Mannu est su gosu a retes unificadas, ma at a èssere s’istòria a nàrrere si su chi at fatu Trump est unu carchi cosa de istòricu.
A su presente b’amus custos pagos puntos: su fogu sessadu in sas 24 oras a pustis de s’acordu firmadu dae Israele e Hamas; su comintzu (graduale) de su ritiru de sas fortzas de ocupatzione (Idf) de s’istadu sionista; sa torrada a Israele de sos ostàgios galu bios (Hamas at pedidu tempus pro torrare finas is mortos) e unos cantos presoneris palestinesos liberados (ma in sa lista de Tel Aviv non b’est Marwa Barghouti); 400 càmios de agiudos umanitàrios cada die autorizados a intrare a Gaza.
A pustis de duos annos de disacatu e de atziones genotzidiàrias, is gazawi ant afestadu una nova de un’acordu chi Israele li podiat nàrrere chi emmo meda in antis de como (si no aiat chertu fàghere su chi at fatu) e chi podiat èssere propostu dae sos partner polìticos-econòmicos internatzionales de s’istadu ebràicu (si no aiant chertu lassare fàghere a Israele su chi at fatu). Bi sunt chertas sas bombas in Qatar de su 9 de cabudanni pro chi Trump intervenneret.
Ma si si podet cumprèndere sa festa in Gaza pro prima cosa est pretzisu fintzas a cumprenderemus: a ue torrant sende chi s’80% de sas domos est a terra? Sas immàgines de is gazawi torra conca a nord sunt de una tristura custa emmo istòrica. “Transumanza” at naradu Enrico Mentana, su giornalista chi in totu custu tempus at impreadu totu sas energias a disponimentu suo pro nàrrere chi in Gaza non b’aiat genotzìdiu.
E a pustis torrados a su chi b’abarrat de sas domos issoro, ite benidore imbeniente bi dêt àere pro custa gente? Perunu istadu palestinesu e galu colònias in Giudea e Samaria.
In su mentres is chi faeddant de custu pianu de paghe che a unu pianu de pighe nche sunt in intro de unos cantos assàchios verbales (chi los lassamus in italianu). «Non volete la pace»; «Siete peggio di Hamas»; «Non vi va giù perché è il piano di Trump»; «Le destre portano alla pace, le sinistre spaccano le vetrine, fanno il week end lungo e le gite in barca a vela» etc.
Sa cosa est fàtzile fàtzile: pro custos assachiadores s’istòria comintzat su 7 de santugaine de su 2023 e finit su 9 de su matessi mese de suos annos a pustis. E sa diferèntzia est totu canta inoghe. Si b’at chie non pensat chi bi potzat àere sorte bona pro su pòpulu palestinesu dae como in susu est ca ischit comente fiat sa chistione in antis de tando.
Si b’at chie imbetzes si permitit de assachiare cun paràulas de velenu puntende su pòddighe contra a is “mai cuntentos” est pròpiu ca mai custos fiant cuntentos de comente si la passaiant custos frades in antis de su 07/10/23. Serrende·la, custos assachiadores sunt indiferentes a su benidore imbeniente de is palestinesos gasi comente fiant indiferentes sos tempus colados.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
