Cun unu votu de diferèntzia ebbia, su Parlamentu europeu at detzìdidu de poderare s’immunidade a s’eurodeputada de Alleanza Verdi e Sinistra Ilaria Salis, deneghende sa recherta de rèvoca fata dae s’Ungheria. In su votu segretu, ant votatu a favore 306, 305 contra, e 17 astenutos. Sa detzisione, retzida in àula cun abbratzos e aplàusos, nd’at pesadu una meca de reatziones polìticas in totu Europa.
Pagos minutos a pustis de su votu, Salis at publicadu in is retes sotziales una foto de issa cun sa manu manca artziada e a pùinu serradu, cun sa frase: “Semus totus antifascistas!”. In una nota ufitziale s’europarlamentare at definidu su votu “una vitòria pro sa democratzia, s’Istadu de deretu e s’antifascismu”, agiunghende chi “sa resistèntzia funtzionat cando tzitadinos, ativistas e rapresentantes elègidos amparant paris is valores democràticos”.
Sa plenària de Istrasburgu duncas at cunfirmadu su chi, cun 13 votos contra e 12 a favore, aiat giai espressadu sa Cummissione Afares Giurìdicos in cabudanni. S’Ungheria imputat a Salis de àere iscutu duos militantes neonazistas in sa manifestatzione de “Die de s’onore” de su 2023, atzione chi dd’est costada 15 meses de presone cunditziones cunsideradas inumanas dae medas osservadores internatzionales.
Medas is crìticas e is polèmincas contra s’imunidade de Ilaria Salis. Matteo Salvini de sa Lega at faeddadu de “birgòngia”, betende sa neghe a “carchi manedda de su tzentrudereta”. Fintzas Nicola Procaccini de Fratelli d’Italia at tentu faeddos graes contra su votu de s’assemblea: “Pro sa manca sa violèntzia polìtica no est de persighire”.
Cuntentos e bregiosos is rapresentantes de sa manca. Pro Fratoianni (Avs) custa est “una bella die pro chie creet in s’Istadu de deretu. S’Europa at naradu no a sa prepotèntzia de su règimene de Orbán”.
Salis, in fines, torradu a nàrrere chi bolet èssere giudicada in Itàlia: “S’Europa depet amparare is valores suos, non a paràulas ebbia, ma cun is fatos. Sa luta no est agabbada: semus totus antifascistas”.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
