S’Assemblea Territoriale Ans Mandrolisai, in collaboratzione cun s‘Eco-museo de Sàdili, proponet un’esperièntzia chi aunit natura, istòria e cultura sarda. Sàbudu su 15 de freàrgiu, sa bidda de Sàdili, connota comente a “sa bidda de s’abba“, s’at a furriare in palcoscènicu de una die ispetziale intitulada “Grutas, abba e… istòria sarda”.
Custa escursione at a permìtere a is partetzipantes de esplorare unas cantas grutas tra is prus dèghidas de sa Barbàgia de Seulu, in unu cuntestu naturale ispantosu. Sa bìsita, chi at a incumentzare su mangianu a is 10, tenet in contu su caminu pro fàghere a sa famada Gruta de is Janas, unu logu ricu de istòria e paristòrias, e sa possibilidade ùnica de intrare a “Su fossu de margiani Ghiani“, a s’ispissu serrada a su pùblicu.
Un’oportunidade rara chi at a permitere de bìvere un’esperièntzia ispeleològica – livellu fàtzile – sinchera, rica de sentidos, sena s’ausìliu de is traditzionales impiantos de illuminatzione, ma petzi cun lughes frontales frunidas dae is organizadores, pro torrare a iscobèrrere sa sensatzione de si nche intrare in is faddidòrgios de sa terra comente aiant fatu is primos esploradores.
A is partetzipantes ddos ant a acumpangiare ghias locales espertas, chi ant a contare s’istòria, su connotu e is legendas de su logu. Piessignu de s’eventu at a èssere s’impreu de sa limba sarda, chi at a permìtere de arrichire s’esperièntzia, torrende sa cultura de su logu a sa forma sua prus sinchera.Sa die at a sighire cun una passigiada cara a “Su Stampu de su turnu“, unu monumentu naturale ispantosu chi aunit sa bellesa de s’ispèntuma cun sa de sa gruta, unu logu incantadore in ue sa naturalesa si mustrat in totu sa fortza sua. A illargu de su trèulu fitianu, is partetzipantes ant a tènnere sa possibilidade de istare imbertos in sa trancuillidade.
Sa bìsita est riservada a unu nùmeru limitadu de partetzipantes, e s’aparauladura est obbrigatòria pro nde garantire s’intrada. Is billetes sunt a disponimentu fintzas a s’acabbare is postos.
Modalidade de aparauladura: Pro reservare su billete tocat a imbiare unu SMS o unu messàgiu in WhatsApp a su nùmeru +39 320 8048450 (Ornella) opuru iscrìere una mail a s’indiritzu atmandrolisaians@gmail.com. Prètziu billete ordinàriu: 20 € Prètziu billete sòtzios ANS: 15 €.
